August 22, 2019
August 22, 2019
അജ്മാൻ: യു.എ.ഇ-യിൽ ഇന്നലെ അറസ്റ്റിലായ തുഷാർ വെള്ളാപ്പള്ളിയെ അജ്മാൻ ജയിലിലേക്ക് മാറ്റി.ബിസിനസ് പങ്കാളിക്ക് വണ്ടിച്ചെക്ക് നൽകിയെന്ന കേസിൽ യുഎഇ സ്വദേശിയുടെ പരാതിയിലാണ് അറസ്റ്റ്.
കഴിഞ്ഞ ദിവസം രാത്രി(21.08.2019) അജ്മാനിലെ ഒരു പഞ്ചനക്ഷത്ര ഹോട്ടലില് വച്ചാണ് ബിഡിജെഎസ് നേതാവ് തുഷാര് വെള്ളാപള്ളിയെ അറസ്റ്റ് ചെയ്തത്. പത്തുവര്ഷം മുമ്പ് അജ്മാനില് ബോയിംഗ് എന്ന പേരില് നിർമ്മാണ കമ്പനി നടത്തിയിരുന്ന കാലത്ത് ഉപകരാര് ജോലികള് ഏല്പിച്ച തൃശ്ശൂര് സ്വദേശി നാസർ അബ്ദുള്ളയ്ക്ക് നല്കിയ വണ്ടിച്ചെക്ക് കേസിലാണ് പോലീസ് നടപടി.
പത്ത് മില്യണ് യുഎഇ ദിര്ഹത്തിന്റെ (പത്തൊമ്പതര കോടി രൂപ)യുടേതാണ് ചെക്ക്. ബിസിനസ് പൊളിഞ്ഞ് നാട്ടിലേക്ക് കടന്ന
തുഷാര് വെള്ളാപ്പള്ളി പിന്നീട് രാഷ്ട്രീയരംഗത്ത് സജീവമായി. ഇതിനിടെ പലതവണ നാസർ അബ്ദുള്ളയ്ക്ക് പണം കൊടുത്തുതീര്ക്കാമെന്നേറ്റെങ്കിലും സ്വാധീനം ഉപയോഗിച്ച് ഒഴിഞ്ഞുമാറുകയായിരുന്നു.
ഒടുവില് സ്വദേശിയുടെ മധ്യസ്ഥതയില് ഒത്തുതീര്പ്പിനു തയ്യാറാണെന്ന് അറിയിച്ച് തുഷാറിനെ നാസർ ഗള്ഫിലേക്ക് ക്ഷണിക്കുകയായിരുന്നു. ഇതുപ്രകാരം ചൊവ്വാഴ്ച രാത്രി അജ്മാനിലെത്തിയ തുഷാറിനെ താമസസ്ഥലത്ത് വച്ച് നാസറിന്റെ പരാതിയില് പോലീസ് അറസ്റ്റ് ചെയ്യുകയായിരുന്നു. അതേസമയം പത്തുവര്ഷം മുമ്പ് നല്കിയ ചെക്കിന് ഇപ്പോള് സാധുത ഇല്ലെന്നാണ് തുഷാറിന്റെ വാദം. ഇത് നിലനിൽക്കാൻ സാധ്യത കുറവാണ്.
ഏത് വിധേനയെങ്കിലും തുഷാറിനെ പുറത്തിറക്കാനുള്ള ശ്രമത്തിലാണ് സുഹൃത്തുക്കൾ. വ്യാഴാഴ്ചയായതിനാൽ ഇന്ന് പുറത്തിറക്കാൻ കഴിഞ്ഞില്ലെങ്കിൽ അടുത്ത ദിവസങ്ങളിൽ പൊതു അവധിയായതിനാൽ രണ്ട് ദിവസം കൂടി തുഷാർ ജയിലിൽ കിടക്കേണ്ടി വരും. വ്യവസായി എം എ യൂസഫലിയുടെയും കേന്ദ്രസര്ക്കാരിന്റെ സഹായവും തുഷാറിന്റെ കുടുംബം തേടുന്നുണ്ട്.അതേസമയം,തുഷാറിനെ മനഃപൂർവം കുടുക്കിയതാണെന്ന് വെള്ളാപ്പള്ളി നടേശൻ പറഞ്ഞു.