September 02, 2021
September 02, 2021
റിയാദ് : സൗദി ടെലിവിഷൻ ചാനലുകളുടെ ഓഫീസുകൾ ദുബായിൽ നിന്നും റിയാദിലേക്ക് മാറ്റുന്നു. സൗദി തലസ്ഥാനത്തെ വാണിജ്യ,വാർത്താവിനിമയ, വിനോദ രംഗങ്ങളിലെ വൻശക്തികളിൽ ഒന്നാക്കാനുള്ള സൗദി രാജകുമാരന്റെ നീക്കത്തിന്റെ ഭാഗമായാണ് ഈ സ്ഥലം മാറ്റം. അൽ ഖുദ്സ് അൽ അറബി എന്ന ലണ്ടൻ ആസ്ഥാനമാക്കി പ്രവർത്തിക്കുന്ന അറബ് പത്രമാണ് ഈ വാർത്ത പുറത്തുവിട്ടത്.
ഒറ്റയടിക്ക് ഇത്തരമൊരു മാറ്റം അസാധ്യമാണ് എന്നതിനാൽ മൂന്ന് ഘട്ടങ്ങളിലായി, ആറ് മാസം കൊണ്ടാവും ഓഫീസുകൾ റിയാദിലേക്ക് മാറ്റുക. അൽ അറബിയ, അൽ ഹാദത്ത് തുടങ്ങിയ പ്രമുഖ ചാനലുകൾ തങ്ങളുടെ പ്രവർത്തകർക്ക് ഇക്കാര്യത്തിൽ നിർദ്ദേശം കൊടുത്തുകഴിഞ്ഞു. അതേസമയം,പെട്ടെന്നുള്ള സ്ഥലം മാറ്റം ഈ ചാനലുകളിലെ തൊഴിലാളികൾക്കിടയിൽ വലിയ തോതിലുള്ള ആശയക്കുഴപ്പമാണ് സൃഷ്ടിക്കുന്നത്. അധ്യയനവർഷം ആരംഭിക്കാനിരിക്കെ, ഇത്തരത്തിൽ ഓഫീസ് മാറുന്നത് കുട്ടികളുടെ ഭാവിയെ പ്രതികൂലമായി ബാധിച്ചേക്കുമെന്നതാണ് ഇവരുടെ ആശങ്ക. ടീവി ചാനലുകൾക്ക് പിന്നാലെ കമ്പനികളുടെ പ്രധാന ഓഫീസുകളും റിയാദിലേക്ക് മാറ്റി സ്ഥാപിക്കാൻ ഉള്ള തയ്യാറെടുപ്പിലാണ് സൗദി അധികൃതർ. ഇത് സംബന്ധിച്ച നോട്ടീസ് ഫെബ്രവരിയിൽ വിദേശകമ്പനികൾക്ക് നൽകിയിരുന്നു. 2024 ജനുവരി ഒന്ന് മുതൽ, റിയാദിൽ ഓഫീസുള്ള അന്താരാഷ്ട്ര കമ്പനികളുമായി മാത്രമേ സൗദി ഗവണ്മെന്റ് കരാറുകളിൽ ഒപ്പിടൂ എന്നാണ് പുറത്തുവരുന്ന റിപ്പോർട്ടുകൾ.
ന്യൂസ്റൂം വാർത്തകൾ ലഭിക്കാൻ 00974 66200167 എന്ന വാട്സ്ആപ് നമ്പറിൽ സന്ദേശം അയക്കുക