February 23, 2022
February 23, 2022
അജു അഷറഫ്
മുംബൈ : അധോലോകനായകൻ ദാവൂദ് ഇബ്രാഹിമിന്റെ ബന്ധുക്കളുമായി സ്ഥലമിടപാട് നടത്തിയെന്ന കേസിൽ മഹാരാഷ്ട്ര മന്ത്രി നവാബ് മാലിക്കിനെ ഇ.ഡി അറസ്റ്റ് ചെയ്തിരിക്കുകയാണ്. പുലർച്ചെ ആറ് മണിക്ക് നവാബ് മാലിക്കിന്റെ വീട്ടിലെത്തിയ ഇ.ഡി സംഘം ഒരുമണിക്കൂർ വീട്ടിലും, എട്ട് മണിക്കൂറോളം ഇ.ഡി ഓഫീസിലും മന്ത്രിയെ ചോദ്യം ചെയ്തതിന് ശേഷമാണ് അറസ്റ്റ് രേഖപ്പെടുത്തിയത്. തീർത്തും അക്ഷോഭ്യനായി കാണപ്പെട്ട നവാബ് മാലിക്ക് മാധ്യമങ്ങൾക്കും അനുയായികൾക്കും നേരെ കൈ വീശുകയും, അന്വേഷണത്തിന് മുന്നിൽ തലകുനിക്കാൻ താൻ തയ്യാറല്ല എന്ന് പ്രതികരിക്കുകയും ചെയ്തു. വിളിപ്പിച്ചിരുന്നെങ്കിൽ ഓഫീസിൽ ചോദ്യം ചെയ്യലിന് ഹാജരാവുമായിരുന്ന തന്നെ, വീട്ടിലെത്തി കൂടെ കൂട്ടിയത് എന്തിനാണെന്ന് മനസിലാവുന്നില്ലെന്നും 61 കാരനായ മന്ത്രി കൂട്ടിച്ചേർത്തു. തനിക്കെതിരെ നടന്നത് ഗൂഢാലോചന ആണെന്നും, ഏറെ വൈകാതെ സത്യം ജയിക്കുമെന്നും മാലിക് മാധ്യമങ്ങളോട് പറഞ്ഞു.
ദാവൂദിന്റെ അടുത്ത ബന്ധുക്കളുമായി മാലിക് ഹവാല ഇടപാടുകൾ നടത്തി എന്നാരോപിച്ച ഇ.ഡി, അന്വേഷണത്തിന്റെ ഭാഗമായി ഫെബ്രുവരി 15 ന് നിരവധി റെയ്ഡുകൾ നടത്തിയിരുന്നു. ദാവൂദിന്റെ ബന്ധുവീടുകളിൽ നടത്തിയ പരിശോധനകൾക്കൊടുവിൽ ദാവൂദിന്റെ സഹോദരൻ ഇഖ്ബാൽ കഷ്കറിനെ അറസ്റ്റ് ചെയ്യുകയും ചെയ്തു. ഇയാളിൽ നിന്നും സ്ഥലമിടപാട് സംബന്ധിച്ച സുപ്രധാന രേഖകൾ ലഭിച്ചെന്നും ഇ.ഡി അറിയിച്ചു. അതേസമയം, ബി.ജെ.പി നയിക്കുന്ന കേന്ദ്രസർക്കാർ ഇ.ഡി.യെ രാഷ്ട്രീയ ലാഭത്തിനായി ഉപയോഗിക്കുകയാണ് എന്നാണ് പ്രതിപക്ഷ കക്ഷികളായ കോൺഗ്രസിന്റെയും എൻ.സി.പി.യുടെയും വാദം. മാലിക്കിനെ ചോദ്യം ചെയ്യുന്നതിനിടെ മുംബൈ ഇ.ഡി ഓഫീസിനടുത്തുള്ള പാർട്ടി ഓഫീസിൽ എൻ.സി.പി അണികൾ പ്രതിഷേധപ്രകടനം നടത്തുകയും ചെയ്തു. ബി.ജെ.പി.യുടെ കാപട്യങ്ങളെ തുറന്നുകാട്ടുമെന്നും അനീതിക്കെതിരായ പോരാട്ടം തുടരുമെന്നുമാണ് എൻ. സി.പി വക്താവ് സഞ്ജയ്‌ തത്കറെ പ്രതികരിച്ചത്.
നാർക്കോട്ടിക് ബ്യൂറോ ഡയറക്ടറായ സമീർ വാംഖഡെയുടെ അഴിമതികൾ നവാബ് മാലിക് നേരത്തേ പുറത്തുവിട്ടിരുന്നു. ഇതിലുള്ള പ്രതികാരമാണ് നിലവിലെ അറസ്റ്റെന്നാണ് മന്ത്രിയുടെ അനുഭാവികൾ പറയുന്നത്. ഇതാദ്യമായല്ല മഹാരാഷ്ട്രാ മന്ത്രിമാരിലൊരാൾ അറസ്റ്റിലാവുന്നത്. മുൻ ആഭ്യന്തര മന്ത്രി അനിൽ ദേശ്മുഖിനെ നാല് മാസങ്ങൾക്ക് മുൻപാണ് ഇ.ഡി അറസ്റ്റ് ചെയ്തത്. നവാബ് മാലിക്കിന്റെ അറസ്റ്റിനെ തുടർന്ന് എൻ.സി.പി ദേശീയ അധ്യക്ഷൻ ശരദ് പവർ ഉന്നതതല നേതാക്കളുടെ അടിയന്തിരയോഗം വിളിച്ചിട്ടുണ്ട്. വരും നാളുകളിൽ ഈ കേസിൽ നിർണ്ണായക വഴിത്തിരിവുകൾ ഉണ്ടാവുമെന്നാണ് കരുതപ്പെടുന്നത്.
