October 13, 2021
October 13, 2021
ഞെട്ടിക്കുന്നൊരു കാഴ്ചക്കാണ് സൗദിയിലെ അൽഖോബാർ തെരുവ് ഇന്ന് സാക്ഷ്യം വഹിച്ചത്. നഗരമധ്യത്തിലൂടെ തെല്ലും കൂസലില്ലാതെ നടന്നുകളിച്ചത് കൂറ്റനൊരു സിംഹമായിരുന്നു. അസീസിയിലെ അംവാജ് ജില്ലയിലാണ് പെൺസിംഹം വിരുന്നെത്തിയത്. സിംഹത്തെ കണ്ട ജനം പേടിച്ചെങ്കിലും, ആൾക്കൂട്ടത്തിന് ഒരു ഉപദ്രവവുമുണ്ടാക്കാതെ സിംഹം നഗരത്തിലൂടെ ഉലാത്തി.
വിവരമറിഞ്ഞെത്തിയ ദേശീയ വന്യ ജീവി ഡവലപ്മെന്റ് കേന്ദ്രത്തിലെ ഉദ്യോഗസ്ഥരാണ് സിംഹത്തെ മയക്കിയത്. ഡോക്ടറുടെ നിർദേശപ്രകാരം മയക്കുവെടി വെച്ച് വീഴ്ത്തിയ സിംഹത്തെ പിന്നീട് മൃഗസംരക്ഷണകേന്ദ്രത്തിലേക്ക് മാറ്റി. എവിടെ നിന്നാണ് സിംഹം നഗരത്തിൽ എത്തിയതെന്ന് വ്യക്തമായിട്ടില്ലെങ്കിലും, ഒരു തരത്തിലുള്ള ആക്രമണസ്വഭാവവും പുറത്തെടുക്കാത്തതിനാൽ മനുഷ്യരോട് ഇണങ്ങിയ സിംഹം ആവുമെന്നാണ് വിദഗ്ധരുടെ നിരീക്ഷണം.
