October 25, 2021
October 25, 2021
ജിസാൻ: സാംതയിലെ അൽ ദാനാ ഫിഷ് ഹോട്ടലിലെ ജീവനക്കാരനായ മലയാളി യുവാവിനെ സ്വന്തം മുറിയിൽ മരിച്ച നിലയിൽ കണ്ടെത്തി. മലപ്പുറം കൊണ്ടോട്ടി മുണ്ടമ്പലം സ്വദേശിയായ സിദ്ധീഖ് കൊടവണ്ടി (49) ആണ് മരണപ്പെട്ടത്. ഹൃദയാഘാതമാണ് മരണകാരണമെന്ന് ഡോക്ടർമാർ സ്ഥിരീകരിച്ചു. വൈകുന്നേരം സിദ്ധീഖ് ജോലിക്ക് ഹാജറാവാഞ്ഞതിനാൽ സഹപ്രവർത്തകൻ റൂമിൽ ചെന്ന് അന്വേഷിച്ചപ്പോഴാണ് മരിച്ചനിലയിൽ കണ്ടെത്തിയത്.
രണ്ട് വർഷം മുൻപ് ജിദ്ദ വിമാനത്താവളത്തിനുള്ള ബന്ധുവിന്റെ ബക്കാലയിലേക്കാണ് സിദ്ധീഖ് ജോലിക്ക് വന്നത്. കോവിഡ് പ്രതിസന്ധി കാരണം ജോലി നഷ്ടപ്പെട്ട സിദ്ധീഖ് പത്ത് ദിവസം മുൻപാണ് അൽ ദാനാ ഹോട്ടലിൽ ജോലിയിൽ പ്രവേശിച്ചത്. നടപടികൾ പൂർത്തിയാക്കിയ ശേഷം മൃതദേഹം സാംതയിൽ തന്നെ ഖബറടക്കുമെന്ന് ബന്ധുക്കൾ അറിയിച്ചു. സിദ്ധീഖിന്റെ ഭാര്യാസഹോദരപുത്രനായ ശാഹുൽ ഹമീദ് ജിദ്ദയിൽ നിന്നും സാംതയിലേക്ക് തിരിച്ചിട്ടുണ്ട്. നാല് മക്കളുടെ പിതാവായ സിദ്ധീഖ്, കൊടവണ്ടി മമ്മദ്- ആയമ്മ ദമ്പതികളുടെ മകനാണ്. ഭാര്യ : അസ്മാബി ഏറാട്ടുതൊടി
