October 18, 2021
October 18, 2021
ജിദ്ദ : പർവതാരോഹണത്തിനിടെ ജിദ്ദയിലെ മലയാളി യുവാവ് ശ്വാസതടസ്സത്തെ തുടർന്ന് മരിച്ചു.ജിദ്ദയിൽ പ്രവാസിയായ മലപ്പുറം വണ്ടൂര്‍ തിരുവാലി സ്വദേശി ചെള്ളിത്തോടിലെ വാളശ്ശേരി സൈഫുള്ള(സൈഫു വണ്ടൂർ) യുടെ മകനും ജിദ്ദ ഇന്ത്യൻ സ്‌കൂൾ പൂർവ വിദ്യാർത്ഥിയുമായ മാസിൻ( 18) ആണ് മരിച്ചത്.പഠനത്തിനായി നാട്ടിലെത്തിയ മാസിൻ ജിദ്ദ ഡാൻസ് ഗ്രൂപ്പിലെ സജീവ സാന്നിധ്യവും സോക്കർ ഫ്രീക്സ് ഫുട്‍ബോൾ അക്കാദമിയിൽ അംഗവുമായിരുന്നു.മഞ്ചേരി ഏറനാട് നോളജ് സിറ്റി ബിബിഎ വിദ്യാര്‍ഥിയായിരുന്നു.
ഒന്നര മാസം മുമ്പാണ് പഠനവുമായി ബന്ധപ്പെട്ട് മാസിന്‍ ദില്ലിയിലേക്ക് പുറപ്പെട്ടത്. തുടര്‍ന്ന് നേപ്പാളിലെ കാഠ്മണ്ഡുവിലെത്തി എവറസ്റ്റ് കയറാന്‍ പോകുന്നതായി വിവരം ലഭിച്ചു.വെള്ളിയാഴ്ച എവറസ്റ്റില്‍ നിന്നും ശ്വാസതടസ്സം അനുഭവപ്പെട്ട് മരിച്ചതായാണ് ശനിയാഴ്ച ബന്ധുക്കള്‍ക്ക് വിവരം ലഭിച്ചത്.ഗൈഡുകളോ സുഹൃത്തുക്കളോ ഇല്ലാതെ ഒറ്റക്കാണ് മാസിൻ പർവതാരോഹണത്തിന് ശ്രമിച്ചതെന്ന് മൌണ്ട് എവറസ്റ്റ് റ്റുഡേ ഡോട്ട് കോം റിപ്പോർട്ട് ചെയ്തു.ബോധരഹിതനായ ഉടൻ ഹിമാലയൻ ആർട്ടിറ്റ്യുട് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പിതൃസഹോദരന്‍ നേപ്പാളിലേക്ക് പുറപ്പെട്ടിട്ടുണ്ട്. മാസിനും കുടുംബവും പാണ്ടിയാടാണ് പുതിയ വീട് വെച്ച് താമസിക്കുന്നത്. മാതാവ്: സമീറ (മഞ്ചേരി). സഹോദരി: ഷെസ.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ 00974 66200167 എന്ന ഖത്തർ വാട്സ്ആപ് നമ്പറിൽ സന്ദേശമയക്കുക.
