February 22, 2022
February 22, 2022
റിയാദ് : ചെറിയ ഇടവേളയ്ക്ക് ശേഷം സൗദിക്കെതിരെ വീണ്ടും ഹൂത്തികളുടെ ആക്രമണം. ജിസാൻ കിങ് അബ്ദുള്ള എയർപോർട്ട് ലക്ഷ്യമാക്കി ഹൂത്തികൾ തൊടുത്തുവിട്ട ഡ്രോൺ, ആകാശത്ത് വെച്ച് വെടിവെച്ചിട്ടതായി സൗദി സഖ്യസേന അറിയിച്ചു. ഡ്രോണിന്റെ അവശിഷ്ടങ്ങൾ പതിച്ച് നാല് പേർക്ക് പരിക്കേറ്റതായും ഔദ്യോഗികവൃത്തങ്ങൾ അറിയിച്ചു.
സാധാരണക്കാരെ ലക്ഷ്യമിട്ടാണ് ഹൂത്തികളുടെ അക്രമണമെന്നും, അതിനാലാണ് ലക്ഷ്യസ്ഥാനമായി വിമാനത്താവളം തിരഞ്ഞെടുത്തതെന്നും സഖ്യസേന പറഞ്ഞു. യമനിലെ സൻ ആ അന്താരാഷ്ട്ര വിമാനത്താവളമാണ് ഡ്രോണുകളുടെ ഉത്ഭവസ്ഥാനമെന്ന് സഖ്യസേന കണ്ടെത്തി. സ്ഫോടനവസ്തുക്കളുമായി ഒരു പൈലറ്റില്ലാ വിമാനവും ഇതേ കേന്ദ്രത്തിൽ നിന്നും ഹൂത്തികൾ അയച്ചിരുന്നു. ഈ ആക്രമണവും സഖ്യസേന വിഫലമാക്കി. പൈലറ്റില്ലാ വിമാനത്തിന്റെ അവശിഷ്ടങ്ങൾ ജിസാൻ പ്രവിശ്യയിലെ അൽമബൂജ് ഗ്രാമത്തിലാണ് പതിച്ചത്. നാശനഷ്ടങ്ങളോ പരിക്കുകളോ റിപ്പോർട്ട് ചെയ്യപ്പെട്ടിട്ടില്ല.