December 23, 2022
December 23, 2022
ന്യൂസ്‌റൂം ബ്യുറോ
ന്യൂഡല്‍ഹി :തീവ്രഹിന്ദുത്വ സംഘടനകളുടെ ആക്രമണത്തില്‍ നിന്നു രക്ഷപ്പെടാൻ ഛത്തീസ്ഗഢില്‍ ക്രിസ്തുമതം സ്വീകരിച്ചവര്‍ പാലായനംചെയ്യുന്നു.
ആദിവാസി മേഖലയായ ബസ്തറിലെ നാരായണ്‍പുര്‍ ജില്ലയില്‍മാത്രം നൂറോളം കൂടുംബങ്ങളാണ് സ്റ്റേഡിയത്തിലും തുറന്ന പ്രദേശങ്ങളിലും പള്ളികളിലും ജീവന്‍രക്ഷിക്കാന്‍ അഭയംതേടിയത്. അറുപതോളം കുടുംബങ്ങളെ ലക്ഷ്യമിട്ടായിരുന്നു ആക്രമണമെന്ന് നാരായണ്‍പുര്‍ ക്രിസ്ത്യന്‍ സൊസൈറ്റി പ്രസിഡന്റ് സുഖ്മാന്‍ പൊതായ് പറഞ്ഞു. ഭട്പാല്‍, മോഡേംഗ, ഗോഹ്ദ, ബൊര്‍വാണ്ട് നഗരങ്ങളിലും അക്രമങ്ങളുണ്ടായി. ആരാധനാലയങ്ങള്‍ തകര്‍ത്ത സംഘങ്ങള്‍ സ്ത്രീകളെയും കുട്ടികളെയും വെറുതെവിട്ടില്ല.
ചേരാങ് ഗ്രാമത്തില്‍ ക്രൂരമര്‍ദനത്തിനിരയായ അമ്പതോളം വിശ്വാസികള്‍ വീടുവിട്ടോടി. ഒക്ടോബറില്‍ മൂന്ന്, നവംബറില്‍ 15, ഡിസംബറില്‍ 21 തവണയുമാണ് ആക്രമണങ്ങളുണ്ടായതെന്ന് പരാതിക്കാരെ ഉദ്ധരിച്ച്‌ മാധ്യമങ്ങള്‍ റിപ്പോര്‍ട്ട് ചെയ്തു. ഞായറാഴ്ച മാത്രം 20 അക്രമങ്ങളുണ്ടായി. സംസ്ഥാനത്തെ കോണ്‍ഗ്രസ് സര്‍ക്കാരും പൊലീസും നടപടിയെടുക്കുന്നില്ല എന്ന് ആരോപിച്ചും കേസെടുക്കണമെന്ന് ആവശ്യപ്പെട്ടും നാരായണ്‍പുര്‍ കലക്ടറേറ്റില്‍ ആയിരങ്ങള്‍ കുത്തിയിരുപ്പ് സമരം നടത്തി. കലക്ടര്‍ക്ക് നിവേദനവും നല്‍കി. പരിക്കേറ്റവരുടെ ചിത്രമടക്കം പരാതി നല്‍കിയിട്ടും കേസെടുക്കുന്നതിനു പകരം പരാതിക്കാരെ മറ്റിടങ്ങളിലേക്ക് മാറ്റിപ്പാര്‍പ്പിക്കാന്‍ ശ്രമിച്ചെന്നും ആക്ഷേപമുണ്ട്.
ബിജെപി നാരായണ്‍പുര്‍ ജില്ലാ പ്രസിഡന്റ് രൂപസായ് സലാം, ബേനൂര്‍ ഗ്രാമത്തിലെ പ്രസിഡന്റ് ഫുല്‍ധര്‍ കച്ചനം, ഭട്പാലിലെ നേതാവ് ശ്യാംലാല്‍ പൊതായ്, അന്തഗഢിലെ പ്രസിഡന്റ് ഭോജരാജ് നാഗ് തുടങ്ങിയര്‍ക്കെതിരെയാണ് പരാതിയെന്ന് ദ് വയര്‍ റിപ്പോര്‍ട്ട് ചെയ്തു. ആര്‍എസ്‌എസാണ് അക്രമികളെ ഇളക്കിവിടുന്നതെന്ന് ഗ്രാമീണര്‍ പറയുന്നു. പതിനഞ്ചോളം ഗ്രാമങ്ങളിലാണ് സ്ഥിതി രൂക്ഷം. ഇവിടെനിന്ന് ക്രിസ്ത്യാനികളെ പുറത്താക്കുകയാണ് ലക്ഷ്യമെന്നും കടുത്ത വിവേചനം നേരിടുകയാണെന്നും ഇവര്‍ മാധ്യമങ്ങളോട് പറഞ്ഞു. ഗോണ്ട്, മുരിയ ഗോത്രവിഭാഗങ്ങളാണ് ഭൂരിപക്ഷം ഗ്രാമീണരും. ഇവരില്‍ പലരും ക്രിസ്തുമതം സ്വീകരിച്ചതാണ് ആര്‍എസ്‌എസിനെ പ്രകോപിപ്പിച്ചത്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/HHOGGyLPTMH45QRaxZQRyz എന്ന ലിങ്കിൽ ജോയിൻ ചെയ്യുക
