November 13, 2019
November 13, 2019
മസ്കത്ത് : വൻ തുകയുടെ സമ്മാനത്തുക ലഭിച്ചുവെന്ന് അറിയിച്ചുകൊണ്ട് മൊബൈൽ ഫോൺ വഴിയോ ഇ മെയിൽ വഴിയോ ലഭിക്കുന്ന സന്ദേശങ്ങൾക്കെതിരെ ജാഗ്രത പാലിക്കണമെന്ന് റോയൽ ഒമാൻ പോലീസ് മുന്നറിയിപ്പ് നൽകി.ബാങ്ക് അക്കൗണ്ട് സംബന്ധിച്ച വിവരങ്ങളോ പിൻ നമ്പറുകളോ മറ്റ് വ്യക്തിഗത വിവരങ്ങളോ ഇത്തരത്തിൽ മറ്റാർക്കും കൈമാറരുതെന്നും പോലീസ് നിർദേശിച്ചു.
സമൂഹ മാധ്യമങ്ങൾ വഴി ലഭിക്കുന്ന സന്ദേശങ്ങൾക്കോ കോളുകൾക്കോ മറുപടി നൽകരുത്.ബാങ്കുകൾ,വാർത്താ വിനിമയ സ്ഥാപനങ്ങൾ,പ്രമുഖ വ്യക്തികൾ എന്നിവരുടേതെന്ന് തെറ്റിദ്ധരിപ്പിച്ചു വരുന്ന സന്ദേശങ്ങൾ അവഗണിക്കണം. ഇത്തരം ആളുകൾക്ക് ഒരു കാരണവശാലും വ്യക്തിഗത വിവരങ്ങൾ കൈമാറരുത്.വൻ തുക സമ്മാനമായി ലഭിച്ചുവെന്നോ സാമ്പത്തിക സഹായങ്ങൾ ആവശ്യപ്പെട്ടോ ഇത്തരം സന്ദേശങ്ങൾ ലഭിക്കാനിടയുണ്ടെന്നും പോലീസ് പ്രസ്താവനയിൽ അറിയിച്ചു.
ഒമാനിൽ നിന്നും ജോലി മതിയാക്കി പോകുന്നവർ സിം കാർഡ്,എ.ടി.എം കാർഡുകൾ എന്നിവ ഉപേക്ഷിച്ചു പോവുകയോ മറ്റാർക്കും കൈമാറുകയോ ചെയ്യരുതെന്നും റോയൽ ഒമാൻ പോലീസ് മുന്നറിയിപ്പ് നൽകി.
