November 21, 2021
November 21, 2021
അജു അഷ്‌റഫ്‌
ദോഹ : ഏഷ്യൻ ഭൂഖണ്ഡത്തിലെ രണ്ടാം ഫുട്ബോൾ ലോകകപ്പിന്, മിഡിൽ ഈസ്റ്റ് മേഖലയിലെ ആദ്യ ഫുട്ബോൾ ലോകകപ്പിന് ഇനി കേവലം 365 നാളുകളുടെ കാത്തിരിപ്പ്. ദോഹ നഗരത്തിൽ പ്രത്യേകമായി സ്ഥാപിച്ച പടുകൂറ്റൻ ക്ലോക്കിൽ ഇന്നുമുതൽ ലോകകപ്പിനായുള്ള കൗണ്ട് ഡൗൺ ആരംഭിക്കും. ആരാധകർക്ക് ഓൺലൈനായി പങ്കെടുക്കാൻ കഴിയുന്ന പ്രത്യേകപരിപാടിയും കൗണ്ട് ഡൗണിനോട് അനുബന്ധിച്ച് ഒരുക്കിയിട്ടുണ്ട്. പ്രാദേശികസമയം രാത്രി 8:30 ന് കോർണിഷിൽ നടക്കുന്ന പരിപാടി അരമണിക്കൂർ നീണ്ടുനിൽക്കുമെന്ന് അധികൃതർ അറിയിച്ചു.
ലോകത്തെ ഒന്നാകെ പിടിച്ചുലച്ച കോവിഡ് മഹാമാരി അടക്കം പ്രതിസന്ധികൾ നിരവധി ഉണ്ടായിട്ടും, ആരെയും അമ്പരപ്പിക്കുന്ന വേഗതയിലാണ് ഖത്തറിന്റെ ലോകകപ്പ് സംഘാടനം മുന്നേറുന്നത്. സ്റ്റേഡിയങ്ങൾ, മെട്രോ, ഹോട്ടലുകൾ തുടങ്ങിയ അടിസ്ഥാനസൗകര്യങ്ങൾ ഒക്കെയും തയ്യാറായി കഴിഞ്ഞു. അറുപതിനായിരം പേരെ ഉൾകൊള്ളാൻ ശേഷിയുള്ള അൽ ബൈത്ത് സ്റ്റേഡിയത്തിലാണ് ലോകകപ്പിന്റെ ഉദ്ഘാടനമത്സരം അരങ്ങേറുക. ഇതടക്കം അത്യാധുനിക സൗകര്യങ്ങളുള്ള എട്ട് സ്റ്റേഡിയങ്ങളാണ് ഖത്തർ ലോകകപ്പിനായി ഒരുക്കിയിട്ടുള്ളത്. ഖത്തറിന്റെ സാംസ്‌കാരികപൈതൃകവും, ആധുനികതയും കൃത്യമായി സമന്വയിപ്പിച്ച് നിർമിച്ച ഈ സ്റ്റേഡിയങ്ങൾ അന്താരാഷ്ട്ര തലത്തിൽ ശ്രദ്ധ നേടിക്കഴിഞ്ഞു. അടുത്ത വർഷത്തോടെ സജ്ജമാവുന്ന, ലുസൈലിലെ സ്റ്റേഡിയത്തിലാണ് ലോകകപ്പിന്റെ കലാശപ്പോരാട്ടം അരങ്ങേറുക.
