March 14, 2022
March 14, 2022
റിയാദ് : സൗദിയിലെ ടാക്സി ചാർജുകളിൽ മാറ്റം വരുത്തിയതായി ഔദ്യോഗിക പ്രഖ്യാപനം. നേരത്തെ, പൊതു ടാക്സികളുടെ മിനിമം ചാർജ് അഞ്ച് റിയാൽ ആയിരുന്നു. ഇത് പത്ത് റിയാൽ ആക്കി വർധിപ്പിച്ചിട്ടുണ്ട്. നാല് പേർ യാത്ര ചെയ്യുന്ന വാഹനത്തിൽ യാത്രക്കാരിനി പത്ത് റിയാൽ മിനിമം നൽകണം. ഓരോ കിലോമീറ്ററിനും ഈടാക്കുന്ന ചാർജിലും വർധനവുണ്ട്.
ഒരു കിലോമീറ്ററിന് ഇതുവരെ 1.8 റിയാൽ ആയിരുന്നു നൽകേണ്ടിയിരുന്നത്. ഇത് 2.1 റിയാലായി ഉയർത്തി. വെയ്റ്റിങ് ചാർജ് 0.8 റിയാലിൽ നിന്നും 0.9 റിയാൽ ആക്കിയിട്ടുണ്ട്. നാലിലധികം ആളുകൾക്ക് യാത്ര ചെയ്യാവുന്ന പൊതുടാക്സികളുടെ നിരക്കിലും സമാനമായ വർധനവുണ്ട്. ഇവയുടെ മിനിമം ചാർജ് 6 റിയാലിൽ നിന്നും 7.3 റിയാലായി വർധിപ്പിച്ചപ്പോൾ, കിലോമീറ്റർ നിരക്ക് 2 റിയാലിൽ നിന്നും 2.4 റിയാലാക്കി മാറ്റി. വലിയ ടാക്സികളുടെ വെയ്റ്റിംഗ് ചാർജിലും .2 റിയാലിന്റെ വർധനവുണ്ട്. ഇന്ധനവില ക്രമാതീതമായി ഉയർന്നതാണ് ടാക്സി നിരക്കിലെ മാറ്റത്തിന് കാരണമെന്നാണ് കരുതപ്പെടുന്നത്.