April 10, 2022
April 10, 2022
മക്ക : സംഗീത ലോകത്തെ പകരം വെക്കാനില്ലാത്ത പ്രതിഭകളിലൊന്നായ എ.ആർ.റഹ്മാൻ വീണ്ടും ഉംറ തീർത്ഥാടനം നിർവഹിച്ചു. തന്റെ മൂന്ന് മക്കൾക്കൊപ്പമാണ് ഓസ്കാർ പുരസ്കാരജേതാവുകൂടിയായ സംഗീത സംവിധായകൻ ഉംറയ്‌ക്കെത്തിയത്. കോവിഡ് മുൻപ് എല്ലാ വർഷവും ഉംറ നിർവഹിക്കാറുള്ള റഹ്മാന് കഴിഞ്ഞ രണ്ട് വർഷമായി കോവിഡ് വ്യാപനം കാരണം മക്കയിലെത്താൻ കഴിഞ്ഞിരുന്നില്ല.
വിശ്വാസികൾ പരിശുദ്ധ കഅബയെ വലംവെയ്ക്കുന്ന ദൃശ്യങ്ങൾ തന്റെ ഇൻസ്റ്റാഗ്രാം അകൗണ്ടിലൂടെ റഹ്മാൻ പങ്കുവെച്ചിട്ടുണ്ട്. മക്കളായ റഹീമ റഹ്മാൻ, ഖദീജ റഹ്മാൻ, എ.ആർ അമീൻ എന്നിവരും പിതാവിനൊപ്പം ഉംറ ചെയ്യാനെത്തി. മക്കയിലെ അൽ മർവ്വ റയ്ഹാൻ ഹോട്ടലിലെ ഷെഫ് ആയ ഹക്കീമുൽ ഇസ്ലാമുമൊത്തുള്ള റഹ്‌മാന്റെ സെൽഫിയും സമൂഹമാധ്യമങ്ങളിൽ പ്രചരിച്ചു. ഹക്കീമുൽ ഇസ്ലാം തന്നെയാണ് ഈ ചിത്രം ഫേസ്ബുക്കിലൂടെ പങ്കുവെച്ചത്.
