February 04, 2023
February 04, 2023
ന്യൂസ്‌റൂം ബ്യുറോ
ജിദ്ദ: മൊബൈല്‍ ഫോണ്‍ പൊട്ടിത്തെറിച്ച് സൗദി ബാലികയ്ക്ക് പരിക്കേറ്റു. സൗദി അറേബ്യയുടെ വടക്കന്‍ അതിര്‍ത്തി മേഖലയിലാണ് സംഭവം. ചാര്‍ജ് ചെയ്യുന്നതിനിടെ മൊബൈല്‍ ഫോണിന് തീപിടിച്ചാണ് 13 വയസുകാരിക്ക് പൊള്ളലേറ്റത്. നില ഗുരുതരമല്ലെന്ന് പോലിസ് അറിയിച്ചു.
മൊബൈല്‍ ഫോണ്‍ ചാര്‍ജ് ചെയ്യുന്നതിനായി ഇലക്ട്രിക് പ്ലഗ്ഗുമായി ബന്ധിപ്പിച്ച പെണ്‍ കുട്ടി ഫോണ്‍ കൈയില്‍ പിടിച്ച് ഉറങ്ങിപ്പോവുകയായിരുന്നു. ചാര്‍ജ്ജിംഗിനിടെ ചൂടായ ഫോണിന് തീപ്പിടിച്ച് പൊട്ടിത്തെറിക്കുകയായിരുന്നു. വ്യാഴാഴ്ച പുലര്‍ച്ചെയാണ് സംഭവം നടന്നതെന്ന് പെണ്‍കുട്ടിയുടെ പിതാവ് പറഞ്ഞു. പെണ്‍കുട്ടിയുടെ നിലവിളി കേട്ടാണ് വീട്ടുകാര്‍ ഉണര്‍ന്നത്. മുറിയില്‍ ചെന്ന് നോക്കിയപ്പോള്‍ കുട്ടിയുടെ കൈയില്‍ നിന്ന് മൊബൈല്‍ ഫോണ്‍ കത്തുകയായിരുന്നു. ഉടന്‍ തന്നെ മൊബൈല്‍ ഫോണ്‍ കൈയില്‍ നിന്ന് താഴേക്ക് തട്ടിയിടുകയായിരുന്നു.
ഉടന്‍ തന്നെ, കൗമാരക്കാരിയെ റഫ സെന്‍ട്രല്‍ ആശുപത്രിയിലെ അത്യാഹിത വിഭാഗത്തിലേക്ക് കൊണ്ടുപോയി, അവിടെ അവള്‍ സുഖം പ്രാപിച്ചു വരികയാണെന്ന് പിതാവ് പറഞ്ഞു. അദ്ഭുതകരമായാണ് വന്‍ ദുരന്തത്തില്‍ നിന്ന് തങ്ങള്‍ രക്ഷപ്പെട്ടതെന്ന് റഫ ഗവര്‍ണറേറ്റിലെ അഞ്ചംഗ കുടുംബം പറഞ്ഞു. മൊബൈല്‍ ഫോണ്‍ ചാര്‍ജറുമായി ബന്ധിപ്പിച്ചാണ് മകള്‍ ഉറങ്ങിയതെന്നും അത് പൊട്ടിത്തെറിച്ചതാണ് അപകട കാരണമെന്നും പിതാവ് വെളിപ്പെടുത്തി.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/CZ8evyItpDFGmuyTIzjnaL എന്ന ലിങ്കിൽ ജോയിൻ ചെയ്യുക
