October 02, 2022
October 02, 2022
ന്യൂസ്‌റൂം ബ്യുറോ
ദോഹ: ഫിഫ ലോകകപ്പിനുള്ള അൽ അന്നാബിയുടെ അവസാന ഘട്ട തയ്യാറെടുപ്പിനുള്ള 27 കളിക്കാരുടെ ടീം അംഗങ്ങളെ മുഖ്യ പരിശീലകൻ ഫെലിക്‌സ് സാഞ്ചസ് ഇന്നലെ പ്രഖ്യാപിച്ചു.അവസാനഘട്ട മിനുക്കുപണികൾ കൂടി പൂർത്തിയാക്കിയ ശേഷം ടീമിൽ ഭേദഗതികൾ വരുത്തിയേക്കും.നവംബർ 13 ആണ് അവസാന 26 അംഗ ടീമിനെ പ്രഖ്യാപിക്കാനുള്ള ഫിഫയുടെ അവസാന തീയതി.
സാദ് അൽ ഷീബ്, മെഷാൽ ബർഷാം, പെഡ്രോ മിഗുവേൽ, താരേക് സൽമാൻ, അബ്ദുൽകരീം ഹസ്സൻ, ബൗലേം ഖൗഖി, അക്രം അഫീഫ്, മുഹമ്മദ് വാദ്, മുസാബ് ഖേദിർ, അലി അസദ്, സേലം അൽ ഹജ്‌രി, ഹസൻ അൽ ഹെയ്‌ദോസ്, മുസ്തഫ മഷാൽ (അൽ സദ്വിദ്), അസിം മഡിബോ, അൽമോസ് അലി, കരീം ബൗദിയാഫ്, ഇസ്മായിൽ മുഹമ്മദ്, മുഹമ്മദ് മുന്താരി, അബ്ദുൽറഹ്മാൻ ഫഹ്മി മുസ്തഫ (അൽ ദുഹൈൽ), യൂസഫ് ഹസൻ, അഹമ്മദ് അലാൽദിൻ, ഹോമം അഹമ്മദ് (അൽ ഗരാഫ), അബ്ദുൽ അസീസ് ഹതേം, നൈഫ് അൽ ഹദ്രമി (അൽ റയാൻ), ഖാലിദ് മുനീർ (അൽ വക്ര) എന്നിവരാണ് ഖത്തറിനായി ബൂട്ടണിയുക.
കിക്കോഫിന് മുന്നോടിയായുള്ള അവസാന മിനുക്കുപണികളുടെ പരിശീലന ക്യാമ്പിനായി കളിക്കാർ സ്പെയിനിലേക്ക് പോകുന്നതിന് മുമ്പ് ഇന്നലെ ദോഹയിൽ പരിശീലന ക്യാമ്പ് ആരംഭിച്ചു.
അതേസമയം,ഇന്ന് അൽ സദ്ദ് എസ്‌സിയിലെ ജാസിം ബിൻ ഹമദ് സ്റ്റേഡിയത്തിൽ തുറന്ന പരിശീലന സെഷൻ സംഘടിപ്പിക്കും.2-2 സമനിലയിൽ അവസാനിച്ച ചിലിക്കെതിരായ അവസാന അന്താരാഷ്ട്ര സൗഹൃദ മത്സരത്തിന് ശേഷം ഓസ്ട്രിയയിൽ ക്യാമ്പ് അവസാനിപ്പിച്ച ദേശീയ ടീമിന്റെ പരിശീലന സെഷന് സാക്ഷ്യംവഹിക്കാൻ ധാരാളം ആരാധകർ എത്തുമെന്നാണ് പ്രതീക്ഷിക്കുന്നത്.ഖത്തർ ദേശീയ ടീമിന് പിന്തുണ അറിയിച്ചുകൊണ്ട് നടത്തുന്ന ഖത്തർ ഫുട്ബോൾ അസോസിയേഷന്റെ (ക്യുഎഫ്എ) പ്രൊമോഷണൽ കാമ്പെയ്‌നിന്റെ ഭാഗമാണ് ഇന്നത്തെ പരിശീലന ക്യാമ്പ്. ടീം സ്പെയിനിലേക്ക് പുറപ്പെടുന്നതിന് മുമ്പുള്ള ദോഹയിലെ പരിശീലന ക്യാമ്പ് ബുധനാഴ്ച വരെ തുടരും.
കഴിഞ്ഞയാഴ്ച വിയന്നയിൽ നടന്ന ആദ്യ സൗഹൃദ മത്സരത്തിൽ ഖത്തർ 0-2ന് കാനഡയോട് തോറ്റിരുന്നു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/HU1j0QE7i26GnMur8CmUvF എന്ന ലിങ്കിൽ ജോയിൻ ചെയ്യുക
