December 10, 2022
December 10, 2022
ന്യൂസ്‌റൂം സ്പോർട്സ് ഡെസ്‌ക്
ദോഹ :ഖത്തർ ലോകകപ്പ് ക്വാർട്ടർ ഫൈനലിൽ ഇന്ന് മൊറോക്കോയുമായി പോരിനിറങ്ങുന്ന പോർചുഗലിന് ജയത്തിൽ കുറഞ്ഞ മറ്റൊരു പ്രതീക്ഷയുമില്ല. ലോകകപ്പിൽ ക്വാർട്ടറിൽ ഇന്ന് പോർച്ചുഗൽ മൊറോക്കോയെ നേരിടും. ആദ്യ ഇലവനിൽ റൊണാൾഡോ ഉണ്ടാകുമോ എന്ന ആകാംക്ഷയോടെ സ്റ്റേഡിയത്തിലെത്തുന്ന ആരാധകരും തീപാറുന്ന പോരാട്ടമാണ് അൽ തുമാമ സ്റ്റേഡിയത്തിൽ ഇന്ന് വൈകുന്നേരം ഖത്തർ സമയം 6 മണിക്ക് പ്രതീക്ഷിക്കുന്നത്.
കഴിഞ്ഞ മൽസരത്തിൽ റൊണാൾഡോയ്ക്ക് പകരമെത്തിയ റാമോസ് ഫോമിലായത് സാന്റോസിനും പോർച്ചുഗലിനും ആത്മവിശ്വാസം നൽകുന്നു. ബ്രൂണോ ഫെർണാണ്ടസും ബെർണാഡോ സിൽവയും അവസരങ്ങൾ സൃഷ്ടിക്കുകയും ഗോൾ നേടുകയും ചെയ്യുന്നതും ആരാധകരെ ഹരം കൊള്ളിക്കും.
അതേസമയം, കായിക ക്ഷമതയും വേഗവുമാണ് മൊറോക്കോ ടീമിൻറെ കരുത്ത്. തന്ത്രങ്ങളെ കളത്തിൽ ഫലിപ്പിക്കാൻ കഴിവുണ്ട് ടീമിന്. അഷ്റഫ് ഹക്കിമി നയിക്കുന്ന പ്രതിരോധവും ബൗഫലിൻറെ മധ്യനിരയും ഒരോ കളിയിലും മെച്ചപ്പെടുന്നതിനൊപ്പം മുന്നേറ്റത്തിൽ സിയേച്ചിൻറെ കാലിലാണ് പ്രതീക്ഷ. സ്പെയിനെതിരായ ടീമിൽ കാര്യമായ മാറ്റം ഉണ്ടായേക്കില്ലെന്നാണ് സൂചന.
രണ്ടാമത്തെ മത്സരത്തിൽ ഫ്രാൻസ് ഇംഗ്ലണ്ടിനെ നേരിടും. രാത്രി ഖത്തർ സമയം 10 മണിക്ക് അൽബെയ്ത്ത് സ്റ്റേഡിയത്തിലാണ് മത്സരം.
കിരീടവും കൊണ്ട് ഖത്തറിലെത്തിയ ഫ്രഞ്ച് പട അതുമായി തന്നെ മടങ്ങാനുള്ള പോരാട്ടത്തിലാണ്. കിലിയൻ എംബാപ്പെ ഗോൾ വല കുലുക്കിയാൽ ഫ്രാൻസിന് സെമിയിലേക്കുള്ള പോക്ക് എളുപ്പമാകും. ജിറൂദും ഗ്രീസ്മാനും ഡെംബലെയും ഫോമിൽ തന്നെ. ഗോൾ വലയ്ക്ക് കീഴിലുള്ള ഹ്യൂഗോ ലോറിസൻറെ പ്രകടനവും നിർണായകമാകും.
ഏതായാലും സെമി ഫൈനൽ ലക്ഷ്യമാക്കിയുള്ള ഇന്നത്തെ രണ്ടു മത്സരങ്ങളിലും ആരാധകരുടെ ആവേശത്തിന് തീപിടിപ്പിക്കുമെന്ന് ഉറപ്പ്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/GNnAPz2ISv601MKXQvNitL എന്ന ലിങ്കിൽ ജോയിൻ ചെയ്യുക
