September 23, 2023
September 23, 2023
ദോഹ:ഖത്തറിൽ ഇന്ന്(സെപ്തംബർ 23) പകലും രാത്രിയും ഏകദേശം തുല്യ ദൈര്‍ഘ്യമുള്ള ദിവസം. സൂര്യന്‍ മധ്യരേഖയ്ക്ക് ലംബമായതിനാലാണ് ദിവസത്തിലെ രാപകലുകള്‍ക്ക് തുല്യദൈര്‍ഘ്യം അനുഭവപ്പെടുന്നതെന്ന് ഖത്തര്‍ കലണ്ടര്‍ ഹൗസ് അറിയിച്ചു.
പകലിന്റെ ദൈര്‍ഘ്യം 12 മണിക്കൂറും 7 മിനിറ്റും ആയിരിക്കുമ്പോള്‍ രാത്രി 11 മണിക്കൂറും 53 മിനിറ്റുമായിരിക്കുമെന്ന് ഖത്തര്‍ കലണ്ടര്‍ ഹൗസിലെ ജ്യോതിശാസ്ത്രജ്ഞന്‍ ഡോ. ബഷീര്‍ മര്‍സൂഖ് പറഞ്ഞു. ഉത്തരാര്‍ധ ഗോളത്തില്‍ ശരത്കാല വിഷുവം പ്രതിഭാസവും തെക്കന്‍ അര്‍ധ ഗോളത്തില്‍ വസന്ത വിഷുവവുമായിരിക്കും.
ശനിയാഴ്ച രാവിലെ 5:23ന് ഉദിച്ച സൂര്യന്‍ വൈകിട്ട് അഞ്ചരയ്ക്കാണ് അസ്തമിക്കുക. ശരത്കാല വിഷുദിനം കാലാവസ്ഥാ വ്യതിയാനങ്ങളുടെ സൂചകമായതിനാല്‍ ഈ പ്രതിഭാസം പ്രധാനമായി കണക്കാക്കുന്നു. കൂടാതെ, ഈ ദിവസം കിഴക്കിന്റെയും പടിഞ്ഞാറിന്റെയും ദിശകള്‍ സൂര്യോദയ സമയത്തും സൂര്യാസ്തമയ സമയത്തും വളരെ കൃത്യതയോടെ നിര്‍ണ്ണയിക്കാന്‍ കഴിയും.
ഈ ദിവസം സൂര്യന്‍ കിഴക്കും പടിഞ്ഞാറും ചക്രവാളങ്ങളിലെ കൃത്യമായ സ്ഥാനങ്ങളില്‍ നിന്ന് ഉദിക്കുകയും അസ്തമിക്കുകയും ചെയ്യും.ഭൂമി സൂര്യനുചുറ്റും ഭ്രമണം ചെയ്യുന്നതിന്റെ ഫലമായാണ് നാല് ജ്യോതിശാസ്ത്ര സീസണുകള്‍ (ശീതകാലം, വസന്തം, വേനല്‍, ശരത്കാലം) സംഭവിക്കുന്നത് . കൂടാതെ ഭൂമിയുടെ അച്ചുതണ്ട് അതിന്റെ ഭ്രമണപഥത്തിന്റെ തലത്തിലേക്ക് 23.5 ഡിഗ്രി ചെരിഞ്ഞതും ശ്രദ്ധിക്കേണ്ടതാണ്.
ന്യൂസ്‌റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/G3GYQhfaTLoDVK1Qr9fc5G
