April 16, 2023
April 16, 2023
ന്യൂസ്‌റൂം ബ്യൂറോ
ദോഹ: ഖത്തറില്‍ വിനോദ സഞ്ചാരം പ്രോത്സാഹിപ്പിക്കുന്നതിന്റെ ഭാഗമായി ഹയ്യ പ്ലാറ്റ്‌ഫോം വികസിപ്പിക്കുമെന്ന് അധികൃതര്‍ വ്യക്തമാക്കി. ഇതിന്റെ ഭാഗമായി ഇ-വിസയുടെ മൂന്ന് പുതിയ വിഭാഗങ്ങള്‍ ഹയ്യയില്‍ ചേര്‍ക്കുമെന്നും ഇതോടെ വിനോദ സഞ്ചാരികള്‍ക്ക് രാജ്യത്തേക്ക് പ്രവേശിക്കാനുള്ള നടപടികള്‍ എളുപ്പമാകുമെന്നും അധികൃതര്‍ അറിയിച്ചു.
ഹയ്യ പ്ലാറ്റ്‌ഫോം വിനോദ സഞ്ചാരികള്‍ക്ക് രാജ്യത്തേക്ക് പ്രവശിക്കാനുള്ള ഏക പോര്‍ട്ടലായി മാറുമെന്ന് ഖത്തര്‍ എയര്‍വെയ്‌സ് ഗ്രൂപ്പ് സിഇഒ അക്ബര്‍ അല്‍ ബേക്കര്‍ പറഞ്ഞു. ഹമദ് ഇന്റര്‍നാഷണല്‍ എയര്‍പോര്‍ട്ടില്‍ നടത്തിയ വാർത്താസമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്.
ദേശീയത, റെസിഡന്‍സി, യാത്രികന് ഇതിനോടകമുള്ള അന്താരാഷ്ട്ര വിസ എന്നിവ അടിസ്ഥാനമാക്കിയാണ് ഇ-വിസയുടെ മൂന്ന് പുതിയ വിഭാഗങ്ങള്‍ ഹയ്യ പ്ലാറ്റ്‌ഫോമില്‍ ചേര്‍ക്കുക. വിസ ഓണ്‍ അറൈവല്‍ അല്ലെങ്കില്‍ വിസ ഫ്രീ എന്‍ട്രിക്ക് യോഗ്യത നേടാത്ത എല്ലാ രാജ്യക്കാരെയും എ1 വിഭാഗത്തില്‍ ഉള്‍പ്പെടുത്തും. ജിസിസി രാജ്യങ്ങളില്‍ നിന്നുള്ളവരെ എ2 വിഭാഗത്തില്‍ ഉള്‍പ്പെടുത്തും. യുകെ, യുഎസ്എ, കാനഡ, ന്യൂസിലാന്‍ഡ് എന്നിവിടങ്ങളില്‍ നിന്നുള്ള വിസയോ റെസിഡന്‍സോ ഉള്ളവരെ എ3 വിഭാഗത്തിലാണ് ഉള്‍പ്പെടുത്തുക.
2030ഓടോ ഓരോ വര്‍ഷവും 6 ദശലക്ഷം സന്ദര്‍ശകരെ രാജ്യത്തേക്ക് ആകര്‍ഷിക്കാന്‍ കഴിയുമെന്നാണ് കരുതുന്നതെന്നും രാജ്യത്തിന്റെ സമ്പദ് വ്യവസ്ഥയെ പരിപോഷിപ്പിക്കുന്നതില്‍ ഇത് വലിയ സംഭാവന നല്‍കുമെന്നും രാജ്യത്തുടനീളം എണ്ണമറ്റ തൊഴിലവസരങ്ങൾ സൃഷ്ടിക്കുമെന്നും അല്‍ ബേക്കര്‍ പറഞ്ഞു.
ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/KIGk615xlF1ILlMGxpUXqI
