November 16, 2023
November 16, 2023
ദോഹ: ഗസയിലെ ഫലസ്തീൻ കുട്ടികളെ സംരക്ഷിക്കാനും യുനെസ്കോയുടെ (UNESCO - യുണൈറ്റഡ് നേഷൻസ് എഡ്യൂക്കേഷണൽ സയന്റിഫിക് ആൻഡ് കൾച്ചറൽ ഓർഗനൈസഷൻ) ചുമതല നിർവഹിക്കാനും കഴിയാത്തതിനാൽ ഖത്തർ അമീർ തമീം ബിൻ ഹമദ് അൽതാനിയുടെ മാതാവും ഖത്തർ എജ്യുക്കേഷൻ എബോവ് ഓൾ ഫൗണ്ടേഷന്റെ (ഇഎഎ) ചെയർപേഴ്‌സനുമായ ഷെയ്ഖ മോസ ബിൻത് നാസർ യുനെസ്‌കോ ഗുഡ്‌വിൽ അംബാസഡർ പദവിയിൽ നിന്ന് രാജിവച്ചു.
തുർക്കി പ്രസിഡന്റിന്റെ ഭാര്യ എമിൻ എർദോഗന്റെ സാന്നിധ്യത്തിൽ ഇസ്താംബൂളിൽ നടന്ന പ്രഥമ വനിതകളുടെ ഉച്ചകോടിയിൽ പങ്കെടുക്കുന്നതിനിടെയാണ് അവർ ഇക്കാര്യം അറിയിച്ചത്. ഖത്തർ സഹമന്ത്രിയും ഖത്തർ നാഷണൽ ലൈബ്രറി മേധാവിയുമായ ഡോ ഹമദ് അബ്ദുൾ അസീസ് അൽ കവാരി, എക്‌സിലൂടെ ഷെയ്ഖ മോസയുടെ നിലപാടിനെ പ്രശംസിച്ചു.
“ലോകത്തിന് പരിഹരിക്കാനാകാത്ത ദുരന്തത്തിൽ നിന്ന് ഗസയിലെ കുട്ടികളെ രക്ഷിക്കുന്നതിൽ യുനെസ്കോയുടെ പരാജയത്തെ അപലപിക്കുന്ന ഒരു തീരുമാനം മാത്രമല്ല ഇത്. ഗസയിലെ കുട്ടികളെ പിന്തുണയ്ക്കുന്നില്ലെങ്കിൽ അവരുടെ ഈ ഒരു റോളിന് എന്ത് അർത്ഥമാണുള്ളത്?'' അൽ കുവാരി പറഞ്ഞു.
2003 മുതൽ യുനെസ്കോയുടെ അടിസ്ഥാന, ഉന്നത വിദ്യാഭ്യാസത്തിനായുള്ള പ്രത്യേക സ്ഥാനപതിയായി ഷെയ്ഖ മോസ സേവനമനുഷ്ഠിച്ചിട്ടുണ്ട്. കൂടാതെ നിരവധി പ്രധാന പദ്ധതികളും ആരംഭിച്ചു.
അതേസമയം, ഗസ മുനമ്പിൽ ഇസ്രായേലിന്റെ ആക്രമണത്തിൽ ഏകദേശം 5,000 ഫലസ്തീൻ കുട്ടികളാണ് കൊല്ലപ്പെട്ടത്.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
