July 01, 2023
July 01, 2023
അൻവർ പാലേരി
ദോഹ : നീണ്ട ഇടവേളക്ക് ശേഷം ശോഭനയുടെ നടനവിസ്മയവും ഗായിക സിതാരയുടെ ആലാപന മാധുര്യവും ഒത്തുചേർന്നപ്പോൾ ദോഹയിലെ അൽ അറബി സ്റ്റേഡിയത്തിലെത്തിയ കലാസ്വാദകർക്ക് അത് വേറിട്ട അനുഭവമായി. നാലു മണിക്കൂറിലധികം നീണ്ടുനിന്ന നടനതാള വിസ്മയങ്ങൾ അക്ഷരാർത്ഥത്തിൽ പ്രേക്ഷകരെ പിടിച്ചിരുത്തിയ നവ്യാനുഭവമായി മാറി.
തെന്നിന്ത്യൻ സിനിമയിൽ ചിരപ്രതിഷ്‌ഠ നേടിയ ഒട്ടേറെ കഥാപാത്രങ്ങൾക്ക് ജീവൻ നൽകിയ ശോഭനയുടെയും സംഘത്തിന്റെയും നൃത്തച്ചുവടുകളോടെയാണ് പരിപാടിക്ക് തുടക്കമായത്.വിഷ്ണു,നയന,അന്നാ പ്രസാദ്,പ്രശസ്ത കൊറിയോഗ്രാഫറും നർത്തകനുമായ ബിജു ധ്വനിതരംഗ് എന്നിവർക്കൊപ്പം ഖത്തറിലെ നൃത്തവേദികളിൽ സ്ഥിരം സാന്നിധ്യമായ കലാപ്രതിഭകൾ കൂടി അണിനിരന്നതോടെ കലയുടെ വേഗച്ചുവടുകൾക്ക് മാന്ത്രിക സൗന്ദര്യം കൈവരികയായിരുന്നു.
തുടർന്ന് വേദി ഏറ്റെടുത്ത സിതാരയുടെ പ്രോജക്റ്റ് മലബാറിക്കസ് ബാൻഡ് ഒന്നര മണിക്കൂറോളം സംഗീതാസ്വാദകർക്ക് പുതിയതും പഴയതുമായ ഗാനങ്ങളുടെ സ്നേഹവിരുന്ന് സമ്മാനിച്ചു.വിവിധ അഭിരുചികളിലുള്ള പാട്ടുകൾ കോർത്തിണക്കി സിതാര ആസ്വാദകരെ കയ്യിലെടുത്തപ്പോൾ അടിപൊളി പാട്ടുകളുമായി സച്ചിൻ വാര്യരും ഓർക്കസ്ട്രയും അൽ അറബി സ്റ്റേഡിയത്തിലെ തിങ്ങിനിറഞ്ഞ ആരാധകരെ ഇളക്കിമറിച്ചു.
സ്‌കൈ മീഡിയയുടെ ബാനറിൽ സംഘടിപ്പിച്ച പരിപാടിയുടെ മുഖ്യപ്രായോജകർ എം.എ.പെർഫോമൻസ് ഗാരേജ് ആയിരുന്നു.
ന്യൂസ്‌റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/GjQM19221WxKnWo2cdbsZe
