November 19, 2020
November 19, 2020
ദോഹ : കോവിഡ് വ്യാപനവുമായി ബന്ധപ്പെട്ട ആശങ്കകൾക്ക് ഒരു പരിധി വരെ വിരാമമിട്ട് വിവിധ കമ്പനികളുടെ പ്രതിരോധ വാക്സിനുകൾ വിതരണത്തിന് തയാറെടുക്കുന്നു.ആഗോള മരുന്ന് നിർമാണ കമ്പനികളായ ഫൈസർ,മോഡേണ എന്നീ കമ്പനികൾ വികസിപ്പിച്ച വാക്സിനുകളാണ് നിലവിൽ വിതരണത്തിന് തയ്യാറായിരിക്കുന്നത്.വിവിധ സ്രോതസ്സുകളില്‍ നിന്ന് കൊവിഡ്-19 വാക്‌സിന്‍ ലഭ്യമാക്കാനുള്ള ഖത്തര്‍ പൊതുജനാരോഗ്യ മന്ത്രാലയത്തിന്റെ സജീവമായ ഇടപെടല്‍ ഫലപ്രദമാണെന്ന് തെളിയിക്കപ്പെട്ടതായി ദേശീയ ആരോഗ്യ സ്ട്രാറ്റജിക് ഗ്രൂപ്പിന്റെ ചെയര്‍മാന്‍ ഡോ. അബ്ദുല്‍ ലത്തീഫ് അല്‍ ഖാല്‍ പറഞ്ഞു. വാക്സിനുകൾ ലഭ്യമായി തുടങ്ങിയാൽ ആദ്യ ഘട്ടത്തിൽ തന്നെ ഖത്തറിൽ വിതരണം ചെയ്തു തുടങ്ങുമെന്ന് ഖത്തർ പൊതുജനാരോഗ്യ മന്ത്രാലയം നേരത്തെ അറിയിച്ചിരുന്നു.ഇതിന്റെ ഭാഗമായി ഈ കമ്പനികളുമായി തുടക്കത്തിൽ തന്നെ ഖത്തർ കരാറിൽ ഒപ്പുവെച്ചിരുന്നു.
പരീക്ഷണം വിജയിച്ചാല്‍ കൊവിഡ്-19 വാക്‌സിന്‍ വാങ്ങുന്നതിനായി ഖത്തര്‍ പൊതുജനാരോഗ്യ മന്ത്രാലയം ഒക്ടോബര്‍ പകുതിയോടെയാണ് മൊഡേണയുമായി കരാര്‍ ഒപ്പിട്ടത്.. ഫൈസറുമായും അതിന്റെ പങ്കാളിത്ത കമ്പനിയായ ബയോ ടെക്‌നുമായും ഖത്തര്‍ സമാനമായ കരാര്‍ ഒപ്പിട്ടിട്ടുണ്ടെന്നും ഡോ. അബ്ദുല്‍ ലത്തീഫ് അല്‍ ഖാല്‍ പറഞ്ഞു.പ്രാഥമിക വിശകലനമനുസരിച്ച് മൊഡേണ വാക്‌സിന്‍ 94.5 ശതമാനം ഫലപ്രദമാണെന്നും അല്‍ ഖാല്‍ പറഞ്ഞു.
കരാര്‍ പ്രകാരം ഫൈസറിന്റെ വാക്‌സീന്‍ വര്‍ഷാവസാനവും മോഡേണയുടേത് അടുത്ത വര്‍ഷം ആദ്യ പകുതിയോടെയും രാജ്യത്തെത്തുമെന്ന് നേരത്തെ അൽ റയാൻ ടെലിവിഷൻ നൽകിയ അഭിമുഖത്തിൽ ഡോ.അൽ ഖാൽ വ്യക്തമാക്കിയിരുന്നു.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക.
