July 25, 2021
July 25, 2021
ദോഹ : ടോക്കിയോ ഒളിംപിക്‌സില്‍ തിളക്കമാര്‍ന്ന പ്രകടനവുമായി ഖത്തര്‍. ജൂഡോയില്‍ ഖത്തര്‍ അത്‌ലീറ്റ് താരം അയൂബ് അല്‍ ഇദ്രിസി പുറത്തായെങ്കിലും റോവിങ്ങില്‍ വനിതാ അത്‌ലീറ്റ് തലാ അബുജബാറ ക്ലാസിഫിക്കേഷന്‍ ഫൈനലില്‍ പ്രവേശിച്ചു. ഇന്ന് രാവിലെ നടന്ന ക്ലാസിഫിക്കേഷന്‍ റൗണ്ട് സെമിഫൈനലില്‍ 8.24.24 സമയം ഫിനിഷ് ചെയ്താണ് തലാ അബു ജബാറ ഒന്നാം സ്ഥാനത്തെത്തിയത്. വെള്ളിയാഴ്ച രാവിലെ നടന്ന റോവിങ്ങില്‍ റോവിങ് സ്‌കള്‍സ് അഞ്ചാം ഹീറ്റില്‍ 8.06.29 സമയത്തില്‍ ഫിനിഷ് ചെയ്ത് അഞ്ചാം സ്ഥാനത്താണ് അബുജബാറ എത്തിയത്. റോവിങ്ങില്‍ ഖത്തറിനെ പ്രതിനിധീകരിച്ച് ഒളിംപിക്‌സിലെത്തിയ ആദ്യ വനിതയാണ് തലാ അബുജബാറ.
അതേസമയം ഇന്നു രാവിലെ നടന്ന 66 കിലോ വിഭാഗത്തില്‍ ഖത്തറിന്റെ ജൂഡോ താരം അയൂബ് അല്‍ ഇദ്രിസി പുറത്തായി. ബെലാറസിന്റെ ദിമിത്രി മിന്‍കോ ആയിരുന്നു എതിരാളി.ഖത്തറിന്റെ 15 താരങ്ങളാണ് ഒളിംപിക്‌സില്‍ പങ്കെടുക്കുന്നത്. ഒരു വനിതാ അത്‌ലീറ്റ് ഉള്‍പ്പെടെ എട്ടു പേര്‍ ട്രാക്ക് ആന്‍ഡ് ഫീല്‍ഡ് ഇനങ്ങളിലുണ്ട്. ഖത്തറിന്റെ ഹൈജംപ് ലോക ചാംപ്യന്‍ മുതാസ് ഇസ ബര്‍ഷിം, 400 മീറ്റര്‍ ഹര്‍ഡില്‍സിലെ ഏഷ്യന്‍ ചാംപ്യന്‍ അബ്ദുല്‍റഹ്മാന്‍ സാംബ തുടങ്ങി ഖത്തറിന്റെ മെഡല്‍ പ്രതീക്ഷകളായ അത്‌ലീറ്റുകളാണ് ഒളിംപിക്‌സില്‍ പങ്കെടുക്കുന്നത്.
