December 07, 2020
December 07, 2020
റിയാദ്: സൗദി തലസ്ഥാനമായ റിയാദിൽ കല്ലും മണലും നിറച്ച ട്രക്ക് മേല്‍പാലത്തില്‍ നിന്ന് താഴെ കാറിന് മുകളില്‍ വീണ് രണ്ടുപേര്‍ക്ക് പരിക്കേറ്റു.റിയാദ് നഗര മധ്യത്തിലാണ് അപകടമുണ്ടായത്.. അല്‍നഹ്ദ റോഡും ഉമര്‍ ബിന്‍ അബ്ദുല്‍ അസീസ് റോഡും സന്ധിക്കുന്നിടത്തെ മേല്‍പ്പാലത്തില്‍ നിന്നാണ് ട്രക്ക് താഴത്തെ റോഡിലേക്ക് പതിച്ചത്.
ചരല്‍ ലോഡുമായി വന്ന ട്രക്ക് നിയന്ത്രണം വിട്ടാണ് താഴേക്ക് പതിച്ചത്. പാലത്തിനടിയിലെ റോഡില്‍ അവസാനത്തെ ട്രാക്കിലൂടെ പോകുകയായിരുന്ന കാറിന് മുകളില്‍ ട്രക്ക് വന്നു വീഴുകയായിരുന്നു. റോഡിന് കുറുകെ മറിഞ്ഞുവീണ ട്രക്കിന്റെ പിന്‍ഭാഗമാണ് കാറിന് മുകളില്‍ പതിച്ചത്. കാറിലുണ്ടായിരുന്ന രണ്ടുപേര്‍ക്കാണ് പരിക്കേറ്റത്.
അവര്‍ ഏത് നാട്ടുകാരാണെന്ന് അറിവായിട്ടില്ല. കാര്‍ പൂര്‍ണമായും തകര്‍ന്ന അവസ്ഥയിലാണ്. റോഡിന് കുറുകെ വീണുകിടക്കുന്ന ട്രക്കില്‍ നിന്ന് ചരല്‍ ലോഡ് മുഴുവന്‍ ഇൗ ഭാഗത്ത് ചിതറി കിടക്കുകയാണ്. വിവരമറിഞ്ഞ ഉടന്‍ എത്തിയ സിവില്‍ ഡിഫന്‍സ് രക്ഷാപ്രവര്‍ത്തനം നടത്തി.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക
