April 12, 2022
April 12, 2022
ദോഹ : രാജ്യത്തിന്റെ വിവിധ ഭാഗങ്ങളിൽ നിന്നായി കാറുകൾ കേന്ദ്രീകരിച്ച് മോഷണം നടത്തിയ യുവാവ് പിടിയിൽ. തൊണ്ടിമുതലുകൾ സഹിതമാണ് ഏഷ്യക്കാരനായ പ്രതിയെ ക്രിമിനൽ ഇൻവെസ്റ്റിഗേഷൻ ഡിപ്പാർട്ട്മെന്റിലെ പ്രത്യേക അന്വേഷണസംഘം അറസ്റ്റ് ചെയ്തത്. കാറുകളിൽ നിന്നും വസ്തുവകകൾ മോഷണം പോകുന്നതായി നിരവധി പരാതികൾ ലഭിച്ചതോടെ അധികൃതർ പ്രത്യേക സംഘം രൂപീകരിക്കുകയായിരുന്നു. അന്വേഷണത്തിനൊടുവിൽ പ്രതിയെ കണ്ടെത്തിയ സംഘം ഇയാളെ അറസ്റ്റ് ചെയ്ത് ബന്ധപ്പെട്ട ഉദ്യോഗസ്ഥർക്ക് കൈമാറി.
കൃത്യമായി അടയ്ക്കാത്ത കാറുകൾ കേന്ദ്രീകരിച്ചു മോഷണം നടത്തുകയായിരുന്നു തന്റെ ശൈലിയെന്ന്‌ ഇയാൾ ചോദ്യം ചെയ്യലിൽ സമ്മതിച്ചു. കാറുകൾ വിലപിടിപ്പുള്ള വസ്തുക്കൾ പുറമെ നിന്ന് കാണുന്ന നിലയിൽ സൂക്ഷിക്കരുതെന്നും, ഡോറുകൾ അടച്ചിട്ടുണ്ടെന്ന് ഉറപ്പുവരുത്തണമെന്നും ആഭ്യന്തര മന്ത്രാലയം അഭ്യർത്ഥിച്ചു. ഒറ്റപ്പെട്ട ഇടങ്ങളിൽ കാർ പാർക്ക് ചെയ്യരുതെന്നും നിർദ്ദേശമുണ്ട്. സംശയാസ്പദമായ സാഹചര്യങ്ങൾ ഉണ്ടായാൽ 999 എന്ന ഹെല്പ് ലൈൻ സേവനം ഉപയോഗിക്കാമെന്നും ആഭ്യന്തര മന്ത്രാലയം ഓർമിപ്പിച്ചു.
