July 16, 2020
July 16, 2020
ദോഹ : ഖത്തറില്‍ പൊതുജനാരോഗ്യ മന്ത്രാലയത്തിന്റെ ഹെല്‍ത്ത് ഫസിലിറ്റി ലൈസന്‍സ് ഉള്ള നഴ്സറി സ്‌കൂളുകള്‍ ഓഗസ്റ്റ് ഒന്നു മുതല്‍ പ്രവര്‍ത്തനം പുനരാരംഭിക്കും. കോവിഡ് 19 നിയന്ത്രണങ്ങള്‍ പിന്‍വലിക്കുന്നതിന്റെ മൂന്നാം ഘട്ടത്തിന്റെ ഭാഗമായാണ് ഓഗസ്റ്റ് 1 മുതല്‍ രാജ്യത്തെ നഴ്സറികള്‍ക്കും ശിശുപരിചരണ കേന്ദ്രങ്ങള്‍ക്കും പ്രവര്‍ത്തനം പുനരാരംഭിക്കാന്‍ അനുമതി നല്‍കിയിരിക്കുന്നത്. എന്നാല്‍ നഴ്‌സറിയില്‍ നഴ്‌സിങ് സേവന സൗകര്യം ഉറപ്പാക്കുന്നതിനുള്ള ഹെല്‍ത് ഫസിലിറ്റി ലൈസന്‍സ് നേടാന്‍ കഴിയാത്തവര്‍ക്ക് പ്രവര്‍ത്തിക്കാന്‍ അനുമതിയില്ലെന്ന് ഭരണനിര്‍വഹണ വികസന തൊഴില്‍ സാമൂഹിക കാര്യമന്ത്രാലയത്തിന്റെ മാര്‍ഗനിര്‍ദേശത്തില്‍ വ്യവസ്ഥ ചെയ്യുന്നു.
ലൈസന്‍സ് കാലാവധി കഴിഞ്ഞവര്‍ക്കും പ്രവര്‍ത്തനാനുമതിയില്ല. നഴ്സറി ജീവനക്കാരുടെയും കുട്ടികളെ നഴ്സറിയിലേക്ക് കൊണ്ടുവരികയും തിരികെ കൊണ്ടുപോകുകയും ചെയ്യുന്നവരുടെയും ഇഹ്തെറാസ് പ്രൊഫൈല്‍ പച്ചയായിരിക്കണം. രക്ഷിതാക്കള്‍ ഓണ്‍ലൈന്‍ ബാങ്കിങ് അല്ലെങ്കില്‍ കാര്‍ഡ് മുഖേന ഫീസ് അടക്കുന്നതാണ് ഉചിതമെന്നും വ്യവസ്ഥ ചെയ്തിട്ടുണ്ട്.
മറ്റു നിബന്ധനകൾ
എല്ലാ ജീവനക്കാര്‍ക്കും കോവിഡ്-19 പരിശോധന നടത്തണം. പരിശോധനയില്‍ നെഗറ്റീവ് ആയ ജീവനക്കാർക്ക് മാത്രമേ അനുമതിയുണ്ടാവൂ.വിട്ടുമാറാത്ത രോഗമുള്ളവര്‍, ഗര്‍ഭിണികള്‍ എന്നിവര്‍ക്ക് ജോലി ചെയ്യാന്‍ അനുമതി നല്‍കരുതെന്നും നിഷ്കര്ഷിച്ചിട്ടുണ്ട്.ഏതെങ്കിലും തരത്തില്‍ അണുബാധയുണ്ടായാല്‍ 14 ദിവസത്തേക്ക് നഴ്സറി അടക്കുകയും പൂര്‍ണമായും അണുവിമുക്തമാക്കുകയും വേണം.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക
