February 02, 2020
February 02, 2020
ദോഹ : ഖത്തറിൽ ഇതുവരെയായി നോവൽ കൊറോണാ വൈറസ് സംശയിക്കുന്ന 25 കേസുകൾ റിപ്പോർട്ട് ചെയ്യപ്പെട്ടതായി പൊതുജനാരോഗ്യ മന്ത്രാലയത്തിലെ മുതിർന്ന ഉദ്യോഗസ്ഥർ അറിയിച്ചു. ഇതിൽ ഇരുപത്തി മൂന്നു കേസുകളും വിശദമായ പരിശോധനയിൽ നെഗറ്റിവാണെന്നു സ്ഥിരീകരിച്ചിട്ടുണ്ട്. രണ്ടു കേസുകൾ അന്തിമഫലത്തിനായി കാത്തിരിക്കുകയാണെന്നും ഇതിന്റെ ഫലം ഇന്ന് വൈകീട്ടോടെ ലഭിക്കുമെന്ന് പ്രതീക്ഷിക്കുന്നതായും പകർച്ച വ്യാധി വിഭാഗം മേധാവി ഡോ.അബ്ദുൽ ലത്തീഫ് അൽ ഖാൽ വ്യക്തമാക്കി. വൈറസ് ബാധ സംശയിക്കുന്നവരിൽ ഒരാൾ സ്വദേശിയും മറ്റൊരാൾ വിദേശിയുമാണ്. ഇവർ രണ്ടുപേരും അടുത്തിടെ ചൈന സന്ദർശിച്ചു ഖത്തറിൽ തിരിച്ചെത്തിയവരാണെന്നും അധികൃതർ വ്യക്തമാക്കി. ദോഹയിൽ വാർത്താ സമ്മേളനത്തിലാണ് അധികൃതർ വ്യക്തമാക്കിയത്.
വൈറസ് ബാധ കണ്ടെത്താൻ ആഴ്ചയിൽ 24 മണിക്കൂറും പ്രവർത്തിക്കുന്ന ലബറോട്ടറി സൗകര്യം സജ്ജമാക്കിയിട്ടുണ്ട്. സംശയിക്കുന്ന രോഗികളെ എത്രയും പെട്ടെന്ന് ഐസൊലേഷൻ വാർഡിലേക്ക് മാറ്റാനുള്ള സൗകര്യമൊരുക്കിയിട്ടുണ്ടെന്നും പ്രാഥമികാരോഗ്യ കേന്ദ്രം മാനേജർ ഡോ.ഖാലിദ് ഹമീദ് എലവദ് അറിയിച്ചു. നിലവിൽ ഖത്തർ കൊറോണാ വൈറസ് മുക്തമാണ്. വൈറസിനെ പ്രതിരോധിക്കാൻ ആവശ്യമായ എല്ലാ സുരക്ഷാ സംവിധാനങ്ങളും പൊതുജനാരോഗ്യ മന്ത്രാലയത്തിന് കീഴിൽ ഒരുക്കിയിട്ടുണ്ടെന്നും അദ്ദേഹം പറഞ്ഞു.
