March 28, 2022
March 28, 2022
കുവൈത്ത് സിറ്റി : റമദാൻ മാസത്തിൽ, മുൻകൂട്ടി അനുമതി വാങ്ങിയതിന് ശേഷം പള്ളികളിൽ ഇഫ്താർ നടത്താമെന്ന് ഔഖാഫ് മന്ത്രാലയം അറിയിച്ചു. അതേസമയം, പള്ളിയുടെ കോമ്പൗണ്ടിന്റെ ഉള്ളിലായി റമദാൻ തമ്പ് കെട്ടാൻ അനുമതി നൽകില്ല. പള്ളിക്ക് പുറത്ത് തയ്യാറാക്കുന്ന തമ്പുകളിലേക്ക് പള്ളിയിൽ നിന്നും വൈദ്യുതി എടുക്കരുതന്നും അധികൃതർ വിശദീകരിച്ചു.
നേരത്തെ, പള്ളികളിൽ ഇഫ്താർ അനുവദിക്കില്ലെന്ന് അധികൃതർ അറിയിച്ചിരുന്നു. ഈ സർക്കുലർ പിൻവലിച്ചാണ്, നിബന്ധനകളോടെ ഇഫ്താർ നടത്താമെന്ന അറിയിപ്പ് പുറത്തിറക്കിയത്. നോമ്പ് തുറക്കുന്നതിന്റെ 20 മിനിറ്റ് മുൻപാണ് ഷീറ്റ് വിരിക്കൽ അടക്കമുള്ള തയ്യാറെടുപ്പുകൾ നടത്തേണ്ടത്. ഇഫ്താർ കഴിഞ്ഞ ഉടനെ പള്ളിയുടെ പരിസരവും ഉൾഭാഗവും ശുചിയാക്കാനുള്ള ഉത്തരവാദിത്തം സംഘാടകർക്കുണ്ടെന്നും അറിയിപ്പിൽ പറയുന്നു.
