January 27, 2022
January 27, 2022
ദോഹ : ഏറെ നാളുകളുടെ ഇടവേളക്ക് ശേഷം, ജനുവരി 30 മുതൽ സ്കൂളുകളിൽ കുട്ടികൾക്ക് നേരിട്ടെത്താമെന്ന പ്രഖ്യാപനത്തിന് പിന്നാലെ കൂടുതൽ നിർദേശങ്ങളുമായി ആരോഗ്യ മന്ത്രാലയം. ആദ്യത്തെ രണ്ട് ആഴ്ചകളിലും എല്ലാ കുട്ടികളിലും ആന്റിജൻ പരിശോധന നടത്തണമെന്നാണ് മന്ത്രാലയത്തിന്റെ നിർദേശം. ഈ കാലയളവിന് ശേഷം, സാഹചര്യം വിലയിരുത്തി ആവശ്യമായ നടപടികൾ സ്വീകരിക്കും. ഖത്തർ ടീവിയിലെ പരിപാടിക്കിടെ മന്ത്രാലയ മേധാവി മുഹമ്മദ്‌ അൽ മറാഖിയാണ് ഇക്കാര്യം അറിയിച്ചത്.
രണ്ടാഴ്ച്ചയ്ക്ക് ശേഷം മുഴുവൻ കുട്ടികളിൽ നിന്നും വിവരങ്ങൾ ശേഖരിച്ച് സർവേ നടത്തുമെന്നും മറാഖി കൂട്ടിച്ചേർത്തു. കോവിഡ് പരിധോധനയിൽ തന്റെ കുട്ടി നെഗറ്റീവ് ആണെന്ന സാക്ഷ്യപത്രങ്ങൾ രക്ഷിതാവ് കുട്ടികളുടെ കൈവശം കൊടുത്തുവിടണമെന്നും നിർദേശമുണ്ട്. കിന്റർഗാർഡൻ മുതലുള്ള മുഴുവൻ കുട്ടികളും ആദ്യ രണ്ട് ആഴ്ചകളിൽ പരിശോധനയ്ക്ക് വിധേയരാകണം. വാക്സിൻ എടുത്ത കുട്ടികൾ, എടുക്കാത്തവർ, കോവിഡ് വന്ന ശേഷം മുക്തരായവർ തുടങ്ങിയ മുഴുവൻ വിദ്യാർത്ഥികൾക്കും ഈ നിബന്ധന ബാധകമാണ്. പൊതുവിദ്യാലയങ്ങളിലെ വിദ്യാർത്ഥികൾക്ക് രണ്ട് ടെസ്റ്റ്‌ കിറ്റുകൾ വീതം നൽകുമെന്നും, സ്കൂളുകൾക്കായി ഒന്നരലക്ഷം പരിശോധനാ കിറ്റുകൾ നൽകിയതായും മന്ത്രാലയം വ്യക്തമാക്കി. കുറച്ചുകുട്ടികൾക്ക് കോവിഡ് പരിശോധനയിൽ പോസിറ്റീവ് ആയാൽ, അവർക്ക് വീടുകളിൽ കൊറന്റൈനിൽ കഴിഞ്ഞുകൊണ്ട് ഓൺലൈനായി ക്ലാസ് ലഭിക്കുമെന്നും മന്ത്രാലയം അറിയിച്ചു.
