January 20, 2022
January 20, 2022
ദോഹ : ഏഷ്യൻ ഹാന്റ്ബോൾ ചാമ്പ്യൻഷിപ്പിൽ നിലവിലെ ജേതാക്കളായ ഖത്തറിന് തിളക്കമാർന്ന വിജയം. ഇറാഖിനെ 37-22 എന്ന സ്കോറിന് തകർത്താണ് ഖത്തർ തുടർച്ചയായ രണ്ടാം ജയം നേടിയത്. ഇതോടെ ടീം അടുത്ത ഘട്ടത്തിൽ ഇടം നേടുമെന്ന് ഏതാണ്ട് ഉറപ്പായി. ഗ്രൂപ്പിലെ അവസാന മത്സരത്തിൽ യു.എ.ഇ യാണ് ഖത്തറിന്റെ എതിരാളികൾ. ഒമാനെ കീഴടക്കാൻ കഴിഞ്ഞതിന്റെ ആത്മവിശ്വാസവുമായാണ് യു.എ.ഇ മത്സരത്തിന് ഇറങ്ങുക.
ടൂർണമെന്റിൽ നാല് തവണ ജേതാക്കളായിട്ടുള്ള ഖത്തറിന് തന്നെയാണ് കിരീടസാധ്യത കൂടുതൽ. 16 ടീമുകൾ ഏറ്റുമുട്ടുന്ന ടൂർണമെന്റിൽ ഇന്ത്യയും മത്സരിക്കാനുണ്ട്. എന്നാൽ, ഇറാനെതിരെ കളത്തിലിറങ്ങിയ ടീമിന് കാലിടറി. 42-29 എന്ന സ്കോറിനാണ് ഇറാൻ ഇന്ത്യയെ വീഴ്ത്തിയത്. ഓരോ ഗ്രൂപ്പിൽ നിന്നും രണ്ട് വീതം രാജ്യങ്ങളാണ് അടുത്ത ഘട്ടത്തിലേക്ക് മുന്നേറുക.
