March 18, 2022
March 18, 2022
കുവൈത്ത് സിറ്റി : കുവൈത്ത് സ്വദേശികളായ മൂന്ന് പേരെ കൊലപ്പെടുത്തിയ കുറ്റത്തിന് ജയിലിൽ കഴിഞ്ഞിരുന്ന ഇന്ത്യക്കാരൻ മരിച്ച നിലയിൽ. ആന്ധ്രാപ്രദേശ് സ്വദേശിയായ വില്ലോട്ട വെങ്കിടേഷിനെയാണ് തൂങ്ങി മരിച്ച നിലയിൽ കണ്ടെത്തിയത്. ഈ മാസം നാലാം തിയ്യതിയാണ് അൽ അർദിയയിലുള്ള അഹ്മദ്, ഭാര്യ ഖാലിദ, മകൾ അസ്മ എന്നിവരെ വെങ്കിടേഷ് കൊലപ്പെടുത്തിയത്.
സി.സി.ടി.വി ദൃശ്യങ്ങൾ പിന്തുടർന്ന് നടത്തിയ അന്വേഷണത്തിനൊടുവിലാണ് ഇയാൾ പിടിയിലായത്. വൈകാതെ പ്രതി കുറ്റം സമ്മതിക്കുകയും ചെയ്തു. സാമ്പത്തികലാഭത്തിന് വേണ്ടിയായിരുന്നു കൊലപാതകങ്ങൾ. വെങ്കിടേഷിൽ നിന്നും അഹ്മദിന്റെ പക്കൽ നിന്നും മോഷ്ടിച്ച 300 ദിനാറും, 600 ദിനാറോളം വിലമതിക്കുന്ന ആഭരണങ്ങളും പോലീസ് കണ്ടെടുത്തിരുന്നു. സംഭവത്തിൽ പോലീസ് ഊർജിതമായ അന്വേഷണം നടത്തും. അതേസമയം, ഇന്ത്യൻ എംബസിയിൽ നിന്നുള്ള ഉദ്യോഗസ്ഥൻ വെങ്കിടേഷിനെ ജയിലിൽ സന്ദർശിച്ചിരുന്നുവെന്നും, പിന്നാലെയാണ് ഇയാൾ തൂങ്ങി മരിച്ചതെന്നും സ്ഥിരീകരിക്കാത്ത റിപ്പോർട്ടുകളുണ്ട്.
