January 11, 2023
January 11, 2023
അൻവർ പാലേരി
ദോഹ : ലോകത്തിന്റെ വിവിധ ഭാഗങ്ങളിൽ നിർത്താതെ ഓടി ഗിന്നസ് ബുക്കിൽ ഇടം പിടിച്ച ഇന്ത്യൻ റണ്ണർ സൂഫിയ സൂഫി ദോഹയിൽ എത്തി.അജ്മീർ സ്വദേശിയായ 35 കാരി സൂഫിയ സൂഫി 35 മണിക്കൂർ കൊണ്ട് ഖത്തറിന്റെ തെക്ക് നിന്ന് വടക്കോട്ട് ഓടി പുതിയ ഗിന്നസ് കുറിക്കാനാണ് ദോഹയിൽ എത്തിയത്.വ്യാഴാഴ്ച രാവിലെ 6 മണിക്ക് അബുസമ്രയിൽ നിന്ന് ആരംഭിക്കുന്ന ദൗത്യം വെള്ളിയാഴ്ച്ച വൈകുന്നേരം അൽ റുവൈസിൽ സമാപിക്കും.35 മണിക്കൂർ കൊണ്ട് 200 കിലോമീറ്റർ ദൂരം ഓടിത്തീർക്കാനാണ് ലക്ഷ്യമാക്കുന്നതെന്ന് ഇന്നലെ ദോഹയിൽ വിളിച്ചുചേർത്ത വാർത്താ സമ്മേളനത്തിൽ സൂഫിയ അറിയിച്ചു.
ഇന്ത്യയ്ക്ക് പുറത്ത് ഇത് ആദ്യമായും തന്റെ കരിയറിലെ ആദ്യ അന്താരാഷ്ട്ര ഉദ്യമവുമാണ് ദോഹയിലേതെന്ന് വാർത്താസമ്മേളനത്തിൽ അവർ വ്യക്തമാക്കി.
കൂടുതൽ വായനക്ക് : ഖത്തർ മുഴുവൻ നിർത്താതെ ഓടിത്തീർക്കാനൊരുങ്ങി ഇന്ത്യക്കാരിയായ സൂഫിയ സൂഫി
6,000 കിലോമീറ്റർ ഗോൾഡൻ ക്വാഡ്രിലാറ്ററൽ റോഡ് ഓട്ടം, മണാലി-ലേ ഹിമാലയൻ അൾട്രാ റൺ ചലഞ്ച്, സിയാച്ചിൻ-കാർഗിൽ അൾട്രാ റൺ എന്നിവ പൂർത്തിയാക്കിയ ഏറ്റവും വേഗമേറിയ ഓട്ടക്കാരി തുടങ്ങിയ ലോക റെക്കോർഡുകളുമായാണ് സൂഫി ദോഹയിൽ എത്തിയത്.ഐ.എസ്.സി വൈസ് പ്രസിഡന്റ് ഷെജി വെലിയകത്തും വാർത്താ സമ്മേളനത്തിൽ പങ്കെടുത്തു.
ഡൽഹി വിമാനത്താവളത്തിലെ ജോലി ഉപേക്ഷിച്ച് റണ്ണറായി മാറിയ സൂഫിയ സൂഫി യുഎഇയിലെ ഏഴ് എമിറേറ്റുകളിലൂടെ ഓടാനുള്ള വലിയ ദൗത്യത്തിന് മുന്നോടിയായാണ് ഖത്തർ ഓടിത്തീർക്കാൻ ഒരുങ്ങുന്നത്.
ന്യൂസ്റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/B5cRGSkveuO5fUeQTErqlq എന്ന ലിങ്കിൽ ജോയിൻ ചെയ്യുക