January 14, 2024
January 14, 2024
കുവൈത്ത് സിറ്റി: കുവൈത്തില്‍ പ്രവാസികള്‍ക്ക് വായ്പ അനുവദിക്കുന്നതിന് ബാങ്കുകള്‍ കര്‍ശന നിയമങ്ങള്‍ ഏര്‍പ്പെടുത്തി. വിദ്യാഭ്യാസം, ആരോഗ്യം തുടങ്ങിയ മേഖലകളില്‍ അനുവദിക്കുന്ന വായ്പകള്‍ക്കാണ് നിയമം കര്‍ശനമാക്കുന്നത്. തൊഴില്‍ മേഖലയിലെ മുന്‍ഗണന അനുസരിച്ചായിരിക്കും ഇനിമുതല്‍ പ്രവാസികള്‍ക്ക് വായ്പകള്‍ അനുവദിക്കുക.
ഡോക്ടര്‍മാര്‍, നഴ്‌സുമാര്‍, ടെക്‌നീഷ്യന്‍മാര്‍ ഉള്‍പ്പെടെയുള്ള പ്രൊഫഷണല്‍സ്, ഉയര്‍ന്ന വരുമാനമുള്ളവര്‍ എന്നിവര്‍ക്ക് മുന്‍ഗണന ലഭിക്കുമെന്നാണ് റിപ്പോര്‍ട്ട്. സ്ഥിരതയുള്ള ജോലിയുള്ള രാജ്യത്തെ സര്‍ക്കാര്‍ ജീവനക്കാരും മുന്‍ഗണന വിഭാഗത്തില്‍ ഉള്‍പ്പെടും. സ്വദേശിവത്ക്കരണ നിയമങ്ങളെ അടിസ്ഥാനമാക്കിയാണിത്. പുതുതായി രാജ്യത്ത് ജോലിയില്‍ പ്രവേശിക്കുന്നവര്‍ക്ക് വായ്പ അനുവദിക്കുന്നതിന് നിയന്ത്രണമേര്‍പ്പെടുത്താനും നീക്കമുണ്ട്.
പ്രവാസികള്‍ക്ക് അനുവദക്കുന്ന വായ്പാ പരിധിയും പരിമിതപ്പെടുത്തും. രാജ്യത്ത് പത്ത് വര്‍ഷത്തെ തുടര്‍ച്ചയായ സേവനമുള്ള ഏകദേശം 1,250 ദിനാര്‍ വരുമാനമുള്ള വ്യക്തിക്ക് അനുവദിക്കുന്ന വായ്പ 25,000 ദിനാറായാണ് പരിമിതപ്പെടുത്തുക. കുറഞ്ഞ ശമ്പളവും കുറഞ്ഞ വിദ്യാഭ്യാസ യോഗ്യതയുമുള്ള 55 വയസ്സിന് മുകളില്‍ പ്രായമുള്ള പ്രവാസി ജീവനക്കാര്‍ക്ക് വായ്പ അനുവദിക്കുന്നതിനായി കര്‍ശന മാനദണ്ഡങ്ങളും ഏര്‍പ്പെടുത്തും.
അതേസമയം കഴിഞ്ഞ വര്‍ഷം സര്‍ക്കാര്‍ മേഖലയിലെ പ്രവാസികള്‍ക്കായുള്ള വായ്പയില്‍ ഗണ്യമായ കുറവുണ്ടായതായാണ് റിപ്പോര്‍ട്ട്.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/KIGk615xlF1ILlMGxpUXqI
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
