April 14, 2024
April 14, 2024
ദോഹ: ഏഷ്യന് രാജ്യങ്ങളില് നിന്നുള്ള യുവ ഫുട്ബോള് താരങ്ങള് അണിനിരക്കുന്ന എഎഫ്സി അണ്ടര് 23 ഏഷ്യന് കപ്പിന് നാളെ ഖത്തറില് തുടക്കമാവും. ഏപ്രില് 15, തിങ്കളാഴ്ച ആരംഭിക്കുന്ന മത്സരങ്ങള് മെയ് 3 വരെ തുടരും. ഏഷ്യയിലെ ഏറ്റവും മികച്ച 16 യുവ ഫുട്ബോള് ദേശീയ ടീമുകള് ടൂര്ണമെന്റില് മാറ്റുരയ്ക്കും. ആതിഥേയ രാജ്യമായ ഖത്തര്, ഓസ്ട്രേലിയ, ജോര്ദാന്, ഇന്തോനേഷ്യ എന്നീ ടീമുകള് ഗ്രൂപ്പ് എയിലും ജപ്പാന്, കൊറിയ റിപ്പബ്ലിക്, യു.എ.ഇ, ചൈന എന്നീ ടീമുകള് ഗ്രൂപ്പ് ബിയിലും സൗദി അറേബ്യ, ഇറാഖ്, തായ്ലന്ഡ്, തജിക്കിസ്ഥാന് എന്നീ ടീമുകള് ഗ്രൂപ്പ് സിയിലും വിയറ്റ്നാം, കുവൈത്ത്, മലേഷ്യ, ഉസ്ബക്കിസ്ഥാന് ടീമുകള് ഗ്രൂപ്പ് ഡിയിലും മത്സരിക്കും. യോഗ്യതാ മത്സരത്തില് യുഎഇയോട് പരാജയപ്പെട്ടതിനാല് ഇന്ത്യ ടൂര്ണമെന്റില് ഇടം പിടിച്ചില്ല.
നാളെ, ഖത്തറിലെ ജാസിം ബിന് ഹമദ് സ്റ്റേഡിയത്തില് നടക്കുന്ന ഉദ്ഘാടന മത്സരത്തില് ഖത്തര് - ഇന്തോനേഷ്യയെ നേരിടും. തജിക്കിസ്ഥാന് റഫറിയായ നസ്രുല്ലോ കബിറോവ് മത്സരം നിയന്ത്രിക്കുമെന്ന് എഎഫ്സി (ഏഷ്യന് ഫുട്ബോള് കോണ്ഫെഡറേഷന്) അറിയിച്ചു. 6.30നാണ് മത്സരം.
അല് ജനൂബ് സ്റ്റേഡിയം, അബ്ദുല്ല ബിന് ഖലീഫ സ്റ്റേഡിയം, ഖലീഫ ഇന്റര്നാഷണല് സ്റ്റേഡിയം എന്നിവിടങ്ങളിലായാണ് മറ്റു മത്സരങ്ങള് നടക്കുക.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F