September 17, 2019
September 17, 2019
ജിദ്ദ: റിയാദില്‍ നിന്ന് അടുത്ത മാസം 16 മുതല്‍ സര്‍വീസ് ആരംഭിക്കുന്ന സൗദിയിലെ ബജറ്റ് എയര്‍ലൈന്‍സായ ഫ്ലൈനാസിന് 634 റിയാല്‍ മുതല്‍ ടിക്കറ്റ് നിരക്ക്.സൗദി അറേബ്യയില്‍ ഏറ്റവും കുറഞ്ഞ നിരക്കില്‍ സര്‍വീസ് നടത്തുന്ന കമ്പനിയാണ് ഫ്ലൈനാസ്. അടുത്ത മാസം 16 മുതല്‍ റിയാദില്‍ നിന്നും കോഴിക്കോട്ടേക്കു സര്‍വീസുകള്‍ ആരംഭിക്കുന്നതായി കമ്പനി ഔദ്യോഗികമായി സ്ഥിരീകരിച്ചു.
634 റിയാല്‍ മുതല്‍ ടിക്കറ്റുകള്‍ ലഭ്യമാണ്. തിങ്കള്‍, ബുധന്‍, വെളളി ദിവസങ്ങളിലായിരിക്കും കോഴിക്കോട്ടേക്കുള്ള സര്‍വീസ്. പുലര്‍ച്ചെ 12.50 ന് റിയാദില്‍ നിന്നും പുറപ്പെടുന്ന വിമാനം രാവിലെ 8.35 ന് കരിപ്പൂരിലെത്തും. 9.25 ന് തിരിച്ച്‌ പുറപ്പെട്ട് 12 ന് റിയാദിലെത്തും. സൗദിയിലെ വിവിധ നഗരങ്ങളിലേക്ക് കണക്ഷന്‍ ഫ്‌ളൈറ്റുകളുമുണ്ട്. 20 കിലോയാണ് സൗജന്യമായി കൊണ്ടുപോകാവുന്ന ബാഗേജ്. നിശ്ചിത സംഖ്യയടച്ചാല്‍ അധികമായി ലഗേജ് കൊണ്ടുപോവാനും സാധിക്കും. കോഴിക്കോടിനൊപ്പം റിയാദില്‍ നിന്നും ദമ്മാമില്‍ നിന്നും ലക്‌നോവിലേക്കും ഫ്‌ളൈ നാസ് സര്‍വീസുകള്‍ ആരംഭിക്കുന്നുണ്ട്. ഡല്‍ഹിയിലേക്കും ഹൈദരാബാദിലേക്കും നേരത്തെ തന്നെ സര്‍വീസുകള്‍ നടത്തുന്നുണ്ട്. താമസിയാതെ ജിദ്ദയില്‍ നിന്നും ദമ്മാമില്‍ നിന്നും കോഴിക്കോട്ടേക്ക് സര്‍വീസുകള്‍ ആരംഭിക്കുമെന്ന പ്രതീക്ഷയിലാണ് പ്രവാസികള്‍.
