November 17, 2021
November 17, 2021
ലോകകപ്പിന് യോഗ്യത തേടി ജപ്പാനെ നേരിടാനിറങ്ങിയ ഒമാന് തോൽവി. ഏകപക്ഷീയമായ ഒരു ഗോളിനാണ് ഒമാൻ ജപ്പാന് മുന്നിൽ കീഴടങ്ങിയത്. ബോഷറിലെ സുൽത്താൻ ഖാബൂസ് ബിൻ സയീദ് സ്റ്റേഡിയത്തിൽ, സ്വന്തം കാണികളുടെ മുന്നിൽ പന്തുതട്ടാൻ ഇറങ്ങിയ ഒമാൻ 81ആം മിനിറ്റിലാണ് ഗോൾ വഴങ്ങിയത്. ജൂനിയർ ഇട്ടോയാണ് സന്ദർശകർക്കായി വല കുലുക്കിയത്. അമിതപ്രതിരോധത്തിലൂന്നി കളിച്ചതാണ് ഒമാന് വിനയായത്. തോൽവിയോടെ ടീമിന്റെ ലോകകപ്പ് യോഗ്യതയ്ക്കുള്ള സാധ്യത തുലാസിലായി.
ഇന്നലെ നടന്ന മറ്റൊരു മത്സരത്തിൽ വിയറ്റ്നാമിനെ തോൽപിച്ച സൗദി അറേബ്യയാണ് ഗ്രൂപ്പിൽ ഒന്നാമതുള്ളത്. ഇതുവരെ തോൽവിയറിയാത്ത സൗദിക്ക് 16 പോയിന്റ് ആണ് സമ്പാദ്യം. 12 പോയിന്റുമായി ജപ്പാൻ, 11 പോയിന്റുമായി ഓസ്‌ട്രേലിയ എന്നിവരാണ് യഥാക്രമം രണ്ട്, മൂന്ന് സ്ഥാനത്തുള്ളത്. ഏഴ് പോയിന്റുമായി നാലാമതുളള ഒമാന് അടുത്ത യോഗ്യതാമത്സരത്തിൽ സൗദിയെ ആണ് നേരിടേണ്ടത്.
