June 28, 2021
June 28, 2021
റിയാദ് :ഹഫര് അല്ബാത്വിനില് ജോലി ചെയ്തിരുന്ന തിരുവനന്തപുരം ആറ്റിങ്ങല് ആലംകോട് സ്വദേശി പ്രദീഷ് ചന്ദ്രശേഖരനെ (34) കഴിഞ്ഞ മൂന്നാഴ്ചയായി കാണാനില്ലെന്ന് പരാതി. ഈ മാസം നാലിന് ജോലിസംബന്ധമായി സ്പോണ്സറുടെ കൂടെ പോയതാണെന്ന് പറയപ്പെടുന്നു.അതിനു ശേഷം ഒരു വിവരവും ലഭിച്ചില്ലെന്ന് ബന്ധുക്കള് പറഞ്ഞു. അഞ്ചു വര്ഷമായി ഒരു സ്വകാര്യ കമ്പനിയിലെ ട്രെയ്ലര് ഡ്രൈവറായി ജോലി ചെയ്തുവരുകയായിരുന്നു. ഏപ്രില് രണ്ടിന് അവധികഴിഞ്ഞ് നാട്ടില്നിന്നെത്തിയ ഇദ്ദേഹം, നിലവിലെ ജോലിയിലുള്ള ബുദ്ധിമുട്ടുകാരണം പുതിയൊരു കമ്പനിയിലേക്ക് ജോലി മാറാന് തയാറെടുക്കുന്നതിനിടെയാണ് കാണാതായത്.
ഇതിനിടെ ബന്ധുക്കളും സുഹൃത്തുക്കളും പല രീതിയില് ബന്ധപ്പെടാന് ശ്രമിച്ചെങ്കിലും ഫലമുണ്ടായില്ല. കാണാതായതിനു പിന്നാലെ, സൗദിയിലുള്ള ബന്ധുവിന്റെ ഫോണിലേക്ക് ഒരു പ്രാവശ്യം പ്രദീഷ് ബന്ധപ്പെട്ടിരുന്നു. 'ജയിലിലേക്ക് കൊണ്ടുപോകുകയാണെന്ന് തോന്നുന്നു' എന്ന് മാത്രം പറഞ്ഞ് കാള് കട്ടാവുകയും തുടര്ന്ന് ഫോണ് പ്രവര്ത്തനരഹിതമാവുകയും ചെയ്തു. ദമ്മാമില്നിന്നുള്ള സാമൂഹികപ്രവര്ത്തകര് അടുത്തുള്ള പൊലീസ് സ്റ്റേഷനില് ബന്ധപ്പെട്ട് അന്വേഷണം നടത്തിയെങ്കിലും വിവരം ലഭിച്ചില്ല. ബന്ധുക്കളുടെയും സുഹൃത്തുക്കളുടെയും ആവശ്യപ്രകാരം സാമൂഹ്യപ്രവർത്തകർ അന്വേഷണം തുടരുന്നുണ്ട്.വിഷയം ഇന്ത്യന് എംബസിയുടെയും ബന്ധപ്പെട്ട അധികാരികളുടെയും ശ്രദ്ധയില്പ്പെടുത്തിയിട്ടുണ്ട്.
ന്യൂസ്റൂം വാർത്തകൾ മുടങ്ങാതെ ലഭിക്കാൻ താഴെ കാണുന്ന ലിങ്കിൽ ക്ലിക്ക് ചെയ്യുക :