March 30, 2022
March 30, 2022
ഖത്തർ ലോകകപ്പിൽ ഇടമുറപ്പിച്ച് റൊണാൾഡോയും സംഘവും. പ്ലേ ഓഫ് ഫൈനലിൽ നോർത്ത് മാസിഡോണിയയെ കീഴടക്കിയാണ് പറങ്കിപ്പട ലോകകപ്പ് ടിക്കറ്റെടുത്തത്. ഏകപക്ഷീയമായ രണ്ട് ഗോളുകൾക്കായിരുന്നു വിജയം. മധ്യനിര താരം ബ്രൂണോ ഫെർണാണ്ടസാണ് ടീമിന്റെ ഇരുഗോളുകളും നേടിയത്. മാഞ്ചസ്റ്ററിലെ സഹതാരം റൊണാൾഡോ ഒരു ഗോളിന് വഴിയൊരുക്കിയപ്പോൾ, ലിവർപൂൾ താരം ഡിയാഗോ ജോട്ടയുടെ ക്രോസിൽ നിന്നാണ് ബ്രൂണോ രണ്ടാം ഗോൾ നേടിയത്. ഇറ്റലിയെ വീഴ്ത്താനായതിന്റെ ആത്മവിശ്വാസവുമായാണ് നോർത്ത് മാസിഡോണിയ ഫൈനൽ പ്ലേഓഫിന് ഇറങ്ങിയത്. പോർച്ചുഗൽ ആദ്യമത്സരത്തിൽ തുർക്കിയെ മറികടന്നിരുന്നു.
ആഫ്രിക്കൻ ഭൂഖണ്ഡത്തിൽ നിന്നും സാദിയോ മാനെയുടെ സെനഗൽ ലോകകപ്പ് യോഗ്യത നേടി. മുഹമ്മദ് സലാഹ് നയിച്ച ഈജിപ്തിന്റെ സ്വപ്നങ്ങൾ തകർത്താണ് സെനഗൽ ഖത്തറിലേക്ക് ടിക്കറ്റെടുത്തത്. പെനാൽറ്റി ഷൂട്ട് ഔട്ടിലായിരുന്നു വിജയം. മറ്റൊരു ആഫ്രിക്കൻ ശക്തിയായ അൾജീരിയക്കും ലോകകപ്പ് യോഗ്യത നേടാനായില്ല. കാമറൂണാണ്, അധിക സമയത്ത് നേടിയ ഗോളിലൂടെ അൾജീരിയയെ തോല്പിച്ചത്. നൈജീരിയ വീഴ്ത്തി ഘാനയും ലോകകപ്പിൽ സ്ഥാനമുറപ്പിച്ചിട്ടുണ്ട്. ടുണീഷ്യ, മൊറോക്കോ എന്നിവരാണ് ആഫ്രിക്കയിൽ നിന്നും ഖത്തർ ലോകകപ്പിനെത്തുന്ന മറ്റ് ടീമുകൾ.