November 17, 2021
November 17, 2021
ദോഹ : ട്രാക്കിലെ മിന്നൽപിണരാവാൻ ഹാമിൽട്ടണും വെർസ്റ്റപ്പനും ഇനി ഏറ്റുമുട്ടുക ഖത്തറിന്റെ മണ്ണിൽ. ഗ്ലാമർ താരങ്ങൾ അണിനിരക്കുന്ന ഖത്തർ ഗ്രാന്റ് പ്രിക്സ് നവംബർ 21 ഞായറാഴ്ച്ച, ഖത്തർ സമയം വൈകീട്ട് അഞ്ചുമണിക്കാണ് അരങ്ങേറുക. ദോഹയിലെ ലുസൈൽ സർക്യൂട്ടിൽ ആണ് മത്സരം.
റെഡ് ബുള്ളിനെ പ്രതിനിധീകരിച്ച് മത്സരിക്കുന്ന മാക്സ് വെർസ്റ്റപ്പനാണ് നിലവിൽ ഒന്നാം സ്ഥാനത്തുള്ളത്. തൊട്ടുപിന്നിൽ, 14 പോയിന്റ് മാത്രം പിറകിലായി മെഴ്സിഡസിന്റെ സൂപ്പർ താരം ലൂയിസ് ഹാമിൽട്ടനുമുണ്ട്. ഖത്തർ ഗ്രാൻഡ് പ്രിക്സ് കഴിഞ്ഞാൽ സൗദി, അബുദാബി എന്നീ ഗ്രാൻഡ് പിക്സുകൾ മാത്രമാണ് സീസണിൽ അവശേഷിക്കുന്നത് എന്നതിനാൽ, വീറും വാശിയും നിറഞ്ഞൊരു പോരാട്ടത്തിനാവും ഖത്തർ സാക്ഷ്യം വഹിക്കുക. വെള്ളി, ശനി ദിവസങ്ങളിലായി ലുസൈലിലെ ട്രാക്കിൽ പരിശീലനമത്സരങ്ങളും അരങ്ങേറും. ശനിയാഴ്ച്ച വൈകീട്ടാണ് സ്റ്റാർട്ടിങ് പൊസിഷനുകൾ നിർണയിക്കാനുള്ള യോഗ്യതാമത്സരം നടക്കുക.