December 18, 2021
December 18, 2021
ദോഹ : അറബ് കപ്പ് സെമിഫൈനലിൽ ഖത്തറിനെതിരെ ഗോൾ നേടിയ അൾജീരിയൻ താരത്തിന് ക്ലബ്ബിലെ സ്ഥാനം നഷ്ടമായി. ഇഞ്ചുറിസമയത്തിന്റെ അവസാനമിനിറ്റിൽ വിജയഗോൾ നേടിയ യൂസുഫ് ബെലൈലിയെയാണ് ഖത്തർ ലീഗിലെ ക്ലബ്ബായ 'ഖത്തർ എസ്.സി' പുറത്താക്കിയത്. സമൂഹമാധ്യമത്തിലൂടെ താരം തന്നെയാണ് ഈ വാർത്ത പുറത്തുവിട്ടത്.
അതേസമയം, അൾജീരിയൻ താരത്തെ എന്തുകൊണ്ട് പുറത്താക്കുന്നു എന്നതിൽ ക്ലബ്ബ് വിശദീകരണം നൽകിയിട്ടില്ല. ഇഞ്ചുറി ടൈമിന്റെ പതിനേഴാം മിനിറ്റിലാണ് പെനാൽറ്റി സ്പോട്ടിൽ നിന്നും കണ്ടെത്തിയ ഗോളിലൂടെ ബെലൈലി, ഖത്തറിന്റെ ഫൈനൽ മോഹങ്ങൾ അവസാനിപ്പിച്ചത്. 29കാരനായ താരം മുപ്പത് മത്സരങ്ങളിൽ നിന്നായി എട്ട് ഗോളുകൾ അൾജീരിയക്കായി നേടിയിട്ടുണ്ട്. ഫുട്ബോൾ ലോകം ഇതാദ്യമായല്ല ഇത്തരമൊരു സംഭവത്തിന് സാക്ഷ്യം വഹിക്കുന്നത്. 2002 ലോകകപ്പിൽ കൊറിയയോട് തോറ്റ് ഇറ്റലി പുറത്തായതിന് പിന്നാലെ വിജയഗോൾ നേടിയ കൊറിയൻ താരത്തെ ഇറ്റാലിയൻ ക്ലബ്ബ് പുറത്താക്കിയിരുന്നു.