November 14, 2021
November 14, 2021
ദോഹ : ടോക്കിയോ ഒളിമ്പിക്സിൽ ഇറ്റാലിയൻ താരവുമായി സ്വർണം പങ്കിട്ടെടുത്ത് ശ്രദ്ധേയനായ ഖത്തർ ഹൈജംപ് താരം എസ്സ ബാർഷിം മറ്റൊരു നേട്ടത്തിന് കൂടി അർഹനായി. 2012 ലണ്ടൻ ഒളിമ്പിക്സിൽ താരം നേടിയ വെങ്കലമെഡലിന് പകരം വെള്ളി നൽകുമെന്ന് അധികൃതർ അറിയിച്ചു. റഷ്യയെ പ്രതിനിധീകരിച്ച് മത്സരിച്ച് ഒന്നാമതെത്തിയ ഇവാൻ ഉഖോവ് ഉത്തേജകമരുന്ന് ഉപയോഗിച്ചെന്ന് തെളിഞ്ഞതിനെ തുടർന്ന് അയോഗ്യനാക്കപ്പെട്ടിരുന്നു. ഇതോടെയാണ് ബാർഷമിന്റെ വെങ്കലം വെള്ളിയായി മാറിയത്.
ലണ്ടൻ ഒളിമ്പിക്സിൽ 2.29 m ഉയരം താണ്ടിയ ബാർഷം, മറ്റ് രണ്ട് പേർക്കൊപ്പം മൂന്നാം സ്ഥാനം പങ്കിടുകയായിരുന്നു. ഇവരുടെ മെഡലുകളും വെള്ളിയായി മാറുമെന്ന് ഒളിമ്പിക്സ് അധികൃതർ അറിയിച്ചു. ഒന്നാമതെത്തിയ റഷ്യൻ താരത്തെ 2019 ലാണ് കായികകോടതി കുറ്റക്കാരനായി വിധിച്ചത്. വിധിക്കെതിരെ താരം അപ്പീലിന് ശ്രമിച്ചെങ്കിലും പരാജയപ്പെടുകയായിരുന്നു. ബാർഷത്തിന്റെ ഒളിമ്പിക്സ് മെഡൽ സമ്പാദ്യം ഇതോടെ ഒരു സ്വർണ്ണവും രണ്ട് വെള്ളിയുമായി. റിയോ ഒളിമ്പിക്സിലും താരം വെള്ളി സ്വന്തമാക്കിയിരുന്നു. പുരുഷ-വനിതാ ഹൈജംപുകൾ അടക്കം അഞ്ചുമത്സരങ്ങളുടെ ഫലമാണ് മാറ്റി നിർണ്ണയിച്ചത്.
