November 14, 2019
November 14, 2019
കുവൈത്ത് സിറ്റി: മൂന്ന് മന്ത്രിമാര്‍ക്കെതിരെ പാര്‍ലമെന്‍റില്‍ കുറ്റവിചാരണ നടക്കാനിരിക്കെ നാടകീയമായി കുവൈത്ത് മന്ത്രിസഭ രാജിവെച്ചു. ഇന്നുച്ചക്കാണ് (വ്യാഴാഴ്ച) പ്രധാനമന്ത്രി ശൈഖ് ജാബിര്‍ അല്‍ മുബാറക് അസ്സബാഹ് അമീര്‍ ശൈഖ് സബാഹ് അഹ്മദ് അല്‍ ജാബിര്‍ അസ്സബാഹിന് രാജി സമര്‍പ്പിച്ചത്. മന്ത്രിസഭയുടെ പ്രവര്‍ത്തനങ്ങള്‍ പുനഃക്രമീകരിക്കുന്നതിനാണ് രാജി സമര്‍പ്പിച്ചതെന്ന് സര്‍ക്കാര്‍ വക്താവ് താരിഖ് അല്‍ മസ്റം വ്യക്തമാക്കി.
ഒരാഴ്ചക്കിടെ രണ്ട് മന്ത്രിമാര്‍ രാജിവെച്ചതിന് പിറകെയാണ് നാടകീയമായി സര്‍ക്കാര്‍ രാജിവെക്കുന്നത്. ധനമന്ത്രി ഡോ. നായിഫ് അല്‍ ഹജ്റുഫ്, പൊതുമരാമത്ത് മന്ത്രി ജിനാന്‍ ബൂഷഹരി എന്നിവരാണ് കഴിഞ്ഞ ആഴ്ച രാജിവെച്ചത്. ആഭ്യന്തര മന്ത്രിയടക്കം മൂന്ന് മന്ത്രിമാര്‍ക്കെതിരെ പാര്‍ലമെന്‍റില്‍ കുറ്റവിചാരണയും നടക്കാനിരിക്കുകയായിരുന്നു.
