September 11, 2021
September 11, 2021
കോവിഡ് വ്യാപനത്തിന് നേരിയ ശമനം വന്നതോടെ ഓഫ്‌ലൈൻ ക്ലാസ് ആരംഭിക്കുന്ന തിയ്യതി പുറത്തുവിട്ടിരിക്കുകയാണ് ജിദ്ദ ഇന്ത്യൻ സ്കൂൾ അധികൃതർ. സെപ്റ്റംബർ 13 തിങ്കളാഴ്ച മുതൽ കുട്ടികൾക്ക് സ്കൂളിലെത്തി പാഠഭാഗങ്ങൾ പഠിക്കാം. പത്ത്, പന്ത്രണ്ട് ക്ലാസുകളിലെ വിദ്യാർത്ഥികൾക്കാവും ആദ്യഘട്ടത്തിൽ ഓഫ് ലൈൻ ക്ലാസുകൾ ആരംഭിക്കുക.
സൗദി വിദ്യാഭ്യാസ വകുപ്പിന്റെ നിർദേശമനുസരിച്ചാണ് ഓഫ്‌ലൈൻ ക്ലാസുകൾ ആരംഭിക്കുന്നതെന്ന് സ്കൂൾ പ്രിൻസിപ്പൽ ഡോ മുസഫർ ഹസൻ വ്യക്തമാക്കി. രണ്ട് ഡോസ് വാക്സിനും സ്വീകരിച്ചവർക്ക് മാത്രമായിരിക്കും ക്ലാസുകളിൽ പ്രവേശനം ലഭിക്കുക. ഇവർ രക്ഷിതാക്കളുടെ സമ്മതപത്രവും ഹാജരാക്കേണ്ടതുണ്ട്. പ്രത്യേക സാഹചര്യമായതിനാൽ സ്കൂളിൽ കാന്റീൻ സൗകര്യങ്ങൾ ഉണ്ടാവില്ലെന്നത് പ്രത്യേകം ഓർമിപ്പിച്ച പ്രിൻസിപ്പൽ, ഗതാഗതസൗകര്യങ്ങളും ഒരറിയിപ്പ് ഉണ്ടാവുന്നത് വരെ സ്കൂൾ ഒരുക്കില്ലെന്നും കൂട്ടിച്ചേർത്തു. മാസ്ക്, സാമൂഹിക അകലം തുടങ്ങിയ എല്ലാ കോവിഡ് മാനദണ്ഡങ്ങളും വിദ്യാർത്ഥികൾ പാലിക്കണമെന്നും സ്കൂൾ പുറത്തിറക്കിയ സർക്കുലറിൽ മുന്നറിയിപ്പുണ്ട്. ഒൻപത്, പതിനൊന്ന് ക്ലാസുകളിലെ വിദ്യാർത്ഥികൾക്ക് സെപ്റ്റംബർ 20 മുതൽ ഓഫ്‌ലൈൻ ക്ലാസ് ആരംഭിക്കുമെന്നും അധികൃതർ അറിയിച്ചു.
