February 10, 2022
February 10, 2022
റിയാദ് : യമനിലെ വിമതസഖ്യമായ ഹൂത്തികൾ, സൗദിക്കെതിരെ വീണ്ടും ആക്രമണം നടത്തി. അബഹ എയർപോർട്ട് ലക്ഷ്യമായി ഹൂത്തികൾ അയച്ച ഡ്രോൺ അറബ് സഖ്യസേന വെടിവെച്ചിട്ടെങ്കിലും, സംഭവത്തിൽ 12 പേർക്ക് പരിക്കേറ്റു. പരിക്കേറ്റവർ വിവിധ രാജ്യങ്ങളിൽ നിന്നുള്ളവരാണ്.
സ്ഫോടനവസ്തുക്കൾ നിറച്ചെത്തിയ ഡ്രോൺ ആകാശത്ത് വെച്ച് തന്നെ തകർക്കാൻ കഴിഞ്ഞതിനാൽ വൻ അപകടമാണ് ഒഴിവായത്. തകർന്ന ഡ്രോണിന്റെ അവശിഷ്ടങ്ങൾ ദേഹത്ത് പതിച്ചാണ് 12 പേർക്ക് പരിക്കേറ്റതെന്ന് സഖ്യസേന വക്താവ് അറിയിച്ചു. സാധാരണക്കാരെയും എയർപോർട്ടുകളെയും മറ്റും ലക്ഷ്യമാക്കി നടത്തുന്ന ഇത്തരം ആക്രമണങ്ങൾക്ക് കനത്ത തിരിച്ചടി നൽകുമെന്നും അദ്ദേഹം കൂട്ടിച്ചേർത്തു.
യമാനുമായി അതിർത്തി പങ്കിടുന്ന പ്രദേശമായതിനാൽ അബഹയിൽ മുൻപും ഹൂത്തികൾ ആക്രമണം നടത്തിയിരുന്നു. കഴിഞ്ഞ ഓഗസ്റ്റ് 31 ന് നടന്ന ആക്രമണത്തിൽ എട്ട് പേർക്ക് പരിക്കേൽക്കുകയും ചെയ്തു.
