November 11, 2021
November 11, 2021
ജിദ്ദ : സൗദിയിൽ കാർ ഒട്ടകത്തെ ഇടിച്ചുണ്ടായ അപകടത്തിൽ പരിക്കേറ്റ് ചികിത്സയിലായിരുന്ന ഡ്രൈവറും മരിച്ചു. മലപ്പുറം പുകയൂർ സ്വദേശിയായ കൊളക്കാടൻ അബ്ദുൾ റഊഫ് (37) ആണ് മരിച്ചത്. കഴിഞ്ഞ എട്ടുവർഷമായി ജിദ്ദ ഷറഫിയ്യയിലെ മൗലവി ജനറൽ സർവീസ് സ്ഥാപനത്തിലെ ജീവനക്കാരനായിരുന്നു റഊഫ്. മലപ്പുറം തുവ്വൂർ സ്വദേശി റിഷാദ് അലി നേരത്തെ മരണമടഞ്ഞിരുന്നു. ഞായറാഴ്ച മദീനയിൽ നിന്നും ജിദ്ദയിലേക്ക് മടങ്ങവേ ആണ് ഇവർ സഞ്ചരിച്ചിരുന്ന ഇന്നോവ കാർ അപകടത്തിൽ പെട്ടത്.
അപകടത്തിൽ പരിക്കേറ്റ ഫർസീന, ഇവരുടെ നാട്ടുകാരനായ നൗഫലിന്റെ ഭാര്യാമാതാവ് റംല എന്നിവർ ജിദ്ദ ഒബ്ഹൂറിലെ കിങ് അബ്ദുള്ള മെഡിക്കൽ കോംപ്ലക്സ് ആശുപത്രിയിൽ ഗുരുതരാവസ്ഥയിൽ കഴിയുകയാണ്. മരിച്ച റിഷാദ് അലിയുടെ മൂന്ന് വയസുള്ള മകളും, നൗഫലിന്റെ ഭാര്യ റിൻസിലയും നേരത്തെ ആശുപത്രി വിട്ടിരുന്നു. റിൻസിലയുടെ സഹോദരനും സുഖം പ്രാപിച്ചു വരുന്നതായി ബന്ധുക്കൾ അറിയിച്ചു.