January 23, 2022
January 23, 2022
ദോഹ : ഏഷ്യൻ ഹാൻഡ്ബോൾ ചാമ്പ്യൻഷിപ്പിൽ നിലവിലെ ജേതാക്കളായ ഖത്തറിന് വീണ്ടും വിജയം. രണ്ടാം ഘട്ട ഗ്രൂപ്പ് മത്സരത്തിലെ കന്നിക്കളിക്കിറങ്ങിയ ഖത്തർ, സൗദി അറേബ്യയെ 34-19 എന്ന സ്കോറിനാണ് തകർത്തുവിട്ടത്. ആദ്യപകുതിയിൽ തന്നെ 7 ഗോളുകളുടെ ലീഡ് സ്വന്തമാക്കിയ ടീം, എതിരാളികൾക്ക് തിരിച്ചുവരാൻ ഒരവസരവും നൽകിയില്ല.
നാല് ടീമുകളുള്ള ഗ്രൂപ്പിൽ നിന്നും ആദ്യ രണ്ട് സ്ഥാനങ്ങളിൽ എത്തുന്നവരാണ് സെമിഫൈനലിലേക്ക് മുന്നേറുക. ഖത്തറിന്റെ ഗ്രൂപ്പിലെ രണ്ടാം മത്സരത്തിൽ സൗത്ത് കൊറിയ ഉസ്ബെക്കിസ്ഥാനെ പരാജയപ്പെടുത്തി. ഉസ്ബെക്കിസ്ഥാനാണ് അടുത്ത മത്സരത്തിൽ ഖത്തറിന്റെ എതിരാളികൾ. 2023 ലോക ചാംപ്യൻഷിപ്പിന് മുന്നോടിയായി നടക്കുന്ന ഈ ടൂർണമെന്റിൽ, ആദ്യ അഞ്ച് സ്ഥാനങ്ങളിൽ എത്തുന്നവർക്ക് ലോക ചാമ്പ്യൻഷിപ്പിലേക്ക് നേരിട്ട് യോഗ്യത ലഭിക്കും.