ദുബായ് :ദുബായിലെ അൽ മക്തൂം വിമാനത്താവളത്തിന്റെ പുതിയ ടെർമിനലിലെത്തുന്ന യാത്രക്കാർക്ക് അവരുടെ ലഗേജുകൾക്കായി കാത്തിരിക്കേണ്ടിവരില്ലെന്ന് ഡനാറ്റ സി.ഇ.ഒ. സ്റ്റീവ് അല്ലെൻ. യാത്രക്കാരുടെ ആവശ്യാനുസരണം അവ ഹോട്ടലുകളിലോ വീടുകളിലോ എത്തിക്കും. ഭാവിയിൽ സാധ്യമായ ഏറ്റവുംമികച്ച യാത്രാനുഭവങ്ങൾ നൽകാനാണ് ലക്ഷ്യമിടുന്നത്.
ലഗേജിനും സുരക്ഷാ പരിശോധനയ്ക്കുമായുള്ള കാത്തിരിപ്പില്ലാതെ ബയോമെട്രിക് സാങ്കേതികവിദ്യ ഉപയോഗിച്ച് തടസ്സമില്ലാത്ത യാത്രാസേവനങ്ങൾ ലഭ്യമാക്കും. 35 ബില്യൺ ഡോളർ ചെലവിലാണ് വിമാനത്താവളം വിപുലീകരിക്കുന്നത്. പ്രതിവർഷം 26 കോടി യാത്രക്കാർക്ക് സേവനങ്ങൾ നൽകുകയാണ് ലക്ഷ്യം.
പ്രവർത്തനങ്ങളിൽ റോബോട്ടിക്സ് ഉൾപ്പെടെയുള്ള സാങ്കേതികവിദ്യകൾ പരമാവധി ഉൾപ്പെടുത്തും. സ്വയംനിയന്ത്രിത ലഗേജ് ട്രാക്ടറുകൾ ഉൾപ്പെടെയുള്ള നൂതന സാങ്കേതികവിദ്യകൾ ഇപ്പോൾ പരീക്ഷിക്കുന്നുണ്ടെന്നും അല്ലെൻ പറഞ്ഞു.
അൽമക്തൂം അന്താരാഷ്ട്ര വിമാനത്താവളത്തിലെ പുതിയ യാത്രാടെർമിനലിന്റെ രൂപരേഖയ്ക്ക് യു.എ.ഇ. വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം ഏപ്രിലിലാണ് അംഗീകാരം നൽകിയത്.
അടുത്ത 10 വർഷത്തിനകം ദുബായ് അന്താരാഷ്ട്ര വിമാനത്താവളത്തിന്റെ (ഡി.എക്സ്.ബി.) എല്ലാ പ്രവർത്തനങ്ങളും ഇവിടേക്ക് മാറ്റും.
ദുബായ് ഏവിയേഷൻ കോർപ്പറേഷന്റെ പദ്ധതിയുടെ ഭാഗമായി 12,800 കോടി ദിർഹം ചെലവാണ് ടെർമിനൽ നിർമാണത്തിന് കണക്കാക്കുന്നത്.
26 കോടി യാത്രക്കാരെ ഉൾക്കൊള്ളാൻ ശേഷിയുള്ള ലോകത്തിലെ ഏറ്റവും വലിയ വിമാനത്താവളമാക്കി അൽ മക്തൂം വിമാനത്താവളത്തിനെ മാറ്റുകയാണ് ഉദ്ദേശ്യം. 70 ചതുരശ്ര കിലോമീറ്റർ വിസ്തൃതിയിൽ 400 എയർക്രാഫ്റ്റ് ഗേറ്റുകളും അഞ്ച് സമാന്തര റൺവേകളും പുതിയ വിമാനത്താവളത്തിലുണ്ടാകും. നിർമാണം പൂർത്തിയാകുമ്പോൾ ഇത് നിലവിലെ ദുബായ് അന്താരാഷ്ട്ര വിമാനത്താവളത്തിന്റെ അഞ്ചിരട്ടിയാകും.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ
ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IkS97YfYEOF9N5vIcYO5wJ
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F 
