March 02, 2024
March 02, 2024
അബുദാബി: യു.എ.ഇയിൽ ഇ–സ്കൂട്ടറിന് മെട്രോയിലും ട്രാമിലും വിലക്കേർപ്പെടുത്തി. കഴിഞ്ഞ ദിവസം രാത്രി വൈകിയാണ് തീരുമാനം വന്നത്. ഇതോടെ ഇ-സ്കൂട്ടറുമായി രാവിലെ മെട്രോ സ്റ്റേഷനുകളിൽ എത്തിയവർ തിരികെ വീടുകളിലേക്ക് മടങ്ങി. സ്റ്റേഷനിൽ നിന്ന് ദൂരെയുള്ള ഓഫിസുകളിലേക്ക് എത്താൻ ഇ–സ്കൂട്ടറാണ് പ്രവാസികൾ കൂടുതലും ആശ്രയിച്ചിരുന്നത്. 1000 – 2000 ദിർഹത്തിന് ലഭിക്കുമെന്നതിനാൽ സ്വന്തം വാഹനമില്ലാത്തവർക്കും ഇ-സ്കൂട്ടർ ആശ്വാസമായിരുന്നു. അതിനാൽ പുതിയ തീരുമാനത്തോടെ പ്രവാസികളുടെ യാത്രാ ചെലവ് വർധിക്കും.
ഇലക്ട്രിക് സ്കൂട്ടർ, സൈക്കിൾ ഉപയോക്താക്കൾ വരുത്തുന്ന നിയമലംഘനങ്ങൾ കണ്ടെത്താൻ റോബോട്ടുകൾ ഉപയോഗിക്കാനും തീരുമാനമുണ്ട്. നിരീക്ഷണത്തിനും നിയമലംഘനങ്ങൾ പിടികൂടാനും ഉപയോഗിക്കുന്ന റോബോട്ട് മാർച്ച് മാസം മുതൽ പരീക്ഷണയോട്ടം ആരംഭിക്കുമെന്ന് അധികൃതർ അറിയിച്ചു. നിർമിത ബുദ്ധി ഉപയോഗിച്ച് പ്രവർത്തിക്കുന്ന റോബോട്ട്, ഹെൽമെറ്റ് ധരിക്കാതിരിക്കുക, നിശ്ചിത സ്ഥലത്തല്ലാതെ സ്കൂട്ടറുകൾ പാർക്ക് ചെയ്യുക, ഇ-സ്കൂട്ടറിൽ ഒന്നിലേറെ യാത്രക്കാർ സഞ്ചരിക്കുക, കാൽനടക്കാർക്ക് മാത്രമായുള്ള ഭാഗങ്ങളിൽ റൈഡ് ചെയ്യുക എന്നിങ്ങനെ വ്യത്യസ്ത നിയമലംഘനങ്ങൾ കണ്ടെത്തും. 300 ദിർഹം വരെ പിഴ ഈടാക്കുന്ന കുറ്റങ്ങളാണിത്. നിയമലംഘനങ്ങൾ കണ്ടെത്തിയാൽ ദുബായ് പൊലീസിന് വിവരങ്ങൾ പങ്കുവെക്കുകയും വിലയിരുത്തൽ നടത്തുകയും ചെയ്യും.
85 ശതമാനത്തിലധികം കൃത്യതയോടെ നിയമ ലംഘനങ്ങൾ തിരിച്ചറിയാനും 5 സെക്കൻഡുകൾക്കുള്ളിൽ ഡാറ്റ കൈമാറാനും റോബോട്ടിന് കഴിയും. 2 കി.മീറ്റർ വരെയുള്ള നിരീക്ഷണ സംവിധാനവും ഇതിലുണ്ട്. വിവിധ കാലാവസ്ഥകളിൽ കാര്യക്ഷമമായി പ്രവർത്തിക്കാൻ സാധിക്കുന്ന രീതിയിലാണ് രൂപകൽപന. 1.5 മീറ്ററിനുള്ളിൽ ഏതെങ്കിലും വസ്തുവിനെയോ വ്യക്തിയെയോ തിരിച്ചറിഞ്ഞാൽ റോബോട്ട് സഞ്ചാരം നിർത്തും. റോഡ് ഉപയോക്താക്കളുടെ സുരക്ഷ ഉറപ്പാക്കുന്നതിന്‍റെ ഭാഗമായാണിത്.
ജുമൈറ-3 ബീച്ച് ഏരിയയിലാണ് റോബോട്ടിന്‍റെ പരീക്ഷണ ഘട്ടം ആരംഭിക്കുക. സംവിധാനത്തിന്‍റെ കാര്യക്ഷമതയും ഭാവിയിൽ വിപുലമായ നടപ്പാക്കലിനുള്ള സാധ്യതയെക്കുറിച്ചും പഠിക്കുകയാണ് ദുബായ് അധികൃതരുടെ ലക്ഷ്യം. പരീക്ഷണം ആരംഭിക്കുന്നതിനായി റോഡ് ഗതാഗത അതോറിറ്റി(ആർ.ടി.എ) റോബോട്ടിക്‌സ്, അഡ്വാൻസ്ഡ് ടെക്‌നിക്കൽ സിസ്റ്റം പ്രൊവൈഡറായ ടെർമിനസ് ഗ്രൂപ്പുമായി കരാറിൽ ഒപ്പുവെച്ചു. ദുബായിൽ ആർ.ടി.എ ആതിഥേയത്വം വഹിക്കുന്ന ‘മെന’ ട്രാൻസ്‌പോർട്ട് കോൺഗ്രസ് ആൻഡ് എക്‌സിബിഷൻ-2024 പരിപാടിക്കിടയിലാണ് കരാർ ഒപ്പിട്ടത്.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
