January 23, 2022
January 23, 2022
അബഹ : സൗദിയിലെ ഖമീസ് മുഷയ്തിൽ താമസിക്കുന്ന മുറിയിൽ പുക ശ്വസിച്ച് മരിച്ച മലയാളിയുടെ മൃതദേഹം നാട്ടിലെത്തിച്ച് സംസ്കരിച്ചു. പത്തനംതിട്ട ജില്ലയിലെ തെങ്ങമം സ്വദേശി സുഭാഷ് (41) ആണ് മരിച്ചത്. ദേവൻ - രോഹിണി ദമ്പതികളുടെ മകനാണ്. അതൂത് ഡാമിനടുത്തുള്ള സ്വദേശി പൗരന്റെ ഡ്രൈവറായി ജോലി ചെയ്ത് വരികയായിരുന്ന സുഭാഷ്, രണ്ട് വർഷങ്ങൾക്ക് മുൻപാണ് ഹൗസ് ഡ്രൈവർ വിസയിൽ സൗദിയിലെത്തിയത്.
ശൈത്യകാലത്ത് റൂമിൽ തീ കത്തിച്ച് തണുപ്പകറ്റാറുണ്ടായിരുന്ന സുഭാഷ്, പതിവ് പോലെ പെയിന്റ് പാട്ടയിൽ തീ കത്തിച്ച ശേഷം ഉറങ്ങിപ്പോവുകയായിരുന്നു. ഉയർന്നുവന്ന പുകയിൽ അടങ്ങിയിരുന്ന വിഷസാന്നിധ്യമാണ് മരണകാരണം. നാട്ടിലുള്ള കുടുംബാംഗങ്ങളുടെ അഭ്യർത്ഥന പ്രകാരം, ഇന്ത്യൻ സോഷ്യൽ ഫോറം ഇടപെട്ടാണ് മൃതദേഹം നാട്ടിലെത്തിച്ചത്. കൊച്ചി നെടുമ്പാശേരി വിമാനത്താവളത്തിൽ എത്തിച്ച മൃതദേഹം ബന്ധുമിത്രാദികൾ ഏറ്റുവാങ്ങി സംസ്കരിച്ചു.
ഭാര്യ : റാണി
മക്കൾ : സൂര്യപ്രിയ, സൂര്യനാരായണൻ
