January 21, 2022
January 21, 2022
അബുദാബി : ജനുവരി 17 ന് ഹൂത്തികൾ അബുദാബിയിൽ നടത്തിയ ആക്രമണത്തിൽ ജീവൻ നഷ്ടപ്പെട്ട രണ്ട് ഇന്ത്യക്കാരും പഞ്ചാബിൽ നിന്നുള്ളവരാണെന്ന് ഇന്ത്യൻ എംബസി സ്ഥിരീകരിച്ചു. ഇവരുടെ മൃതദേഹങ്ങൾ നാട്ടിലെത്തിക്കാനുള്ള നടപടിക്രമങ്ങൾ പൂർത്തിയായതായും മൃതദേഹങ്ങൾ ഇന്ന് നാട്ടിലെത്തിക്കുമെന്നും എംബസി അറിയിച്ചു. ജനുവരി 17 ന് നടന്ന ആക്രമണത്തിൽ രണ്ട് ഇന്ത്യക്കാർക്കും ഒരു പാകിസ്ഥാൻ സ്വദേശിക്കുമാണ് ജീവൻ നഷ്ടപെട്ടത്.
പഞ്ചാബിലെ അമൃത്സറിലേക്കാണ് മൃതദേഹങ്ങൾ എത്തിക്കുകയെന്നും, യുഎഇ സർക്കാരും അഡ്നോക് ഗ്രൂപ്പും പൂർണ പിന്തുണ നൽകിയതായും അംബാസിഡർ സഞ്ജയ്‌ സുധീർ അറിയിച്ചു. അഡ്‌നോക്കിൽ ജോലി ചെയ്തിരുന്ന ജീവനക്കാരാണ് മരിച്ച പഞ്ചാബ് സ്വദേശികൾ. പരിക്കേറ്റ ആറ് പേരിൽ രണ്ട് പേർ ഇന്ത്യക്കാരാണെന്നും എംബസി അധികൃതർ അറിയിച്ചു.
