March 14, 2022
March 14, 2022
ദോഹ : ഖത്തറിലെ ഏറ്റവും പ്രധാനപ്പെട്ട ഫുട്‍ബോൾ കിരീടത്തിൽ മുത്തമിടാൻ, കലാശക്കളിക്ക് ആരൊക്കെ ടിക്കറ്റെടുക്കുമെന്ന് ഇന്നറിയാം. ഇന്ന് നടക്കുന്ന സെമി ഫൈനലുകളോടെ ടൂർണമെന്റിന്റെ ഫൈനൽ ചിത്രം തെളിയും. സീസണിൽ അവിസ്മരണീയ കുതിപ്പ് നടത്തുന്ന അൽ സദ്ദ് എഫ്സിയും, ചിരവൈരികളായ അൽ ദുഹൈലും തമ്മിലുള്ള ഗ്ലാമർ പോരാട്ടവും സെമിയിൽ അരങ്ങേറും.
ഖത്തർ സമയം വൈകീട്ട് അഞ്ചുമണിക്ക് അൽ ഖറാഫയും അൽ വക്രയും തമ്മിലാണ് ഒന്നാം സെമി. ജാസ്സിം ബിൻ ഹമദ് സ്റ്റേഡിയമാണ് മത്സരത്തിന് വേദിയാവുന്നത്. പിന്നാലെ, ഇതേ സ്റ്റേഡിയത്തിൽ, രാത്രി 7.45 ന് അൽ സദ്ദ് എഫ്.സിയും ദുഹൈലും ഏറ്റുമുട്ടും. ഖത്തർ സ്റ്റാർസ് ലീഗിൽ സ്വപ്നസമാനമായ കുതിപ്പ് നടത്തുന്ന അൽ സദ്ദ്, ഒരു മത്സരത്തിൽ പോലും തോൽവി രുചിച്ചിട്ടില്ല. ഇരുടീമുകളും സീസണിൽ രണ്ടുവട്ടം ഏറ്റുമുട്ടിയപ്പോൾ സമനിലയായിരുന്നു ഫലം. തുടർച്ചയായ മൂന്നാം കിരീടത്തിൽ മുത്തമിടാൻ അൽ സദ്ദ് എഫ്.സിയും, അൽ സദ്ദിന്റെ ആധികാരികതയ്ക്ക് തടയിടാൻ ദുഹൈലും ഇറങ്ങുമ്പോൾ, വീറും വാശിയുമേറിയ പോരാട്ടമാണ് കാണികളെ കാത്തിരിക്കുന്നത്. മാർച്ച്‌ 18 നാണ് ടൂർണമെന്റിന്റെ ഫൈനൽ.
