May 20, 2023
May 20, 2023
അൻവർ പാലേരി
ദോഹ/ ചെന്നൈ :കേരളത്തിൽ നിന്നുള്ള വിമാനത്താവളങ്ങളിൽ കസ്റ്റംസ് പരിശോധനകൾ ശക്തമായതോടെ മലയാളികൾ ഉൾപെടെ ഇന്ത്യയിൽ നിന്നുള്ള സ്വർണക്കടത്തുകാർ ചെന്നൈ വിമാനത്താവളം കേന്ദ്രമാക്കുന്നതായി റിപ്പോർട്ട്.കഴിഞ്ഞ ഒരാഴ്ചയ്ക്കിടെ കോടിക്കണക്കിന് രൂപയുടെ കള്ളക്കടത്ത് സ്വർണമാണ് വിമാനത്താവളത്തിൽ കസ്റ്റംസ് വിഭാഗം പിടികൂടിയത്.ദുബായ്,ദോഹ,കൊളംബോ എന്നിവിടങ്ങളിൽ നിന്നാണ് ഏറ്റവും കൂടുതൽ സ്വർണം ഇവിടേക്ക് എത്തുന്നതെന്നാണ് അന്വേഷണ ഉദ്യോഗസ്ഥർ പറയുന്നത്.
മെയ് 18 ന് ദോഹയിൽ നിന്നെത്തിയ ഒരു യാത്രക്കാരനിൽ നിന്ന് 28.13 ലക്ഷം രൂപ വിലമതിക്കുന്ന 524 ഗ്രാം സ്വർണമാണ് കസ്റ്റംസ് പിടികൂടിയത്.അതേ ദിവസം, കൊളംബോയിൽ നിന്നുള്ള ഒരു ശ്രീലങ്കൻ യാത്രക്കാരി തന്റെ അടിവസ്ത്രത്തിൽ 18.89 ലക്ഷം രൂപ വിലമതിക്കുന്ന 352 ഗ്രാം സ്വർണം ഒളിപ്പിച്ചു കടത്താൻ ശ്രമിച്ചതിന് പിടിയിലായി.അതേ ദിവസം തന്നെ മറ്റൊരു കേസിൽ കൊളംബോയിൽ നിന്നുള്ള ശ്രീലങ്കൻ യാത്രക്കാരൻ 20.29 ലക്ഷം രൂപ വിലമതിക്കുന്ന 378 ഗ്രാം സ്വർണം ഒളിപ്പിച്ചു കടത്താൻ ശ്രമിച്ചതിന് അറസ്റ്റിലായി.
മെയ് 16ന് ദുബായിൽ നിന്നെത്തിയ രണ്ട് യാത്രക്കാരെ സ്വർണം ഒളിപ്പിച്ചു കടത്താൻ ശ്രമിച്ചതിന് പിടികൂടിയിരുന്നു. ഒരു യാത്രക്കാരനിൽ നിന്ന് 42.95 ലക്ഷം രൂപയുടെ 800 ഗ്രാം സ്വർണവും മറ്റൊരു യാത്രക്കാരനിൽ നിന്ന് 33.02 ലക്ഷം രൂപ വിലമതിക്കുന്ന 615 ഗ്രാം സ്വർണവുമാണ് പിടികൂടിയത്. മെയ് 11 ന് ദുബായിൽ നിന്നെത്തിയ യാത്രക്കാരനെ പരിശോധിച്ചപ്പോൾ സ്ട്രോളർ ബാഗിന്റെ മെറ്റൽ ബീഡിംഗിൽ നിന്ന് 47.5 ലക്ഷം രൂപ വിലമതിക്കുന്ന 900 ഗ്രാം സ്വർണം കണ്ടെത്തി. 17.15 ലക്ഷം രൂപ വിലമതിക്കുന്ന 325 ഗ്രാം സ്വർണം ഒളിപ്പിച്ചതിന് കൊളംബോയിൽ നിന്നുള്ള മറ്റൊരു യാത്രക്കാരനെയും അതേ ദിവസം പിടികൂടിയിരുന്നു.
ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/CnQu0Sm89HsFGubs4fWsFe